Deputetja Rudina Hajdari tha nga foltorja e Kuvendit se është e pamundur që Shqipëria të anëtarësohet në Bashkimin Evropian, për aq kohë sa fshatrat e vendit vuajnë ende për bukë, ujë, drita dhe infrastrukturë.
Hajdari u shpreh se shëndetësia ndodhet në gjendje mjerane. Ndërsa sa i përket rrugëve, deputetja tha se nuk është bërë asnjë rrugë e re, por i është vendosur trau mijëra qytetarëve që nuk kanë mundësi të paguajnë tarifë.
“Jemi në një situatë të vështira që nuk kemi qenë ndonjëherë më parë. Shëndetësia ka qenë e kapur nga tenderat e disa ministrave që kanë qenë këtu më përpara. Ju flisni për rrugë, por nuk keni bërë asnjë rrugë të re”, deklaroi Hajdari.
Gjithashtu, Hajdari përfundoi fjalën e saj, duke thënë se: “Ç’kusur kam unë të merrem me kusuret e kundërshtimeve, me çdo gjë që kanë ndodhur më përpara?
Ç’kusur kam unë që opozita të më akuzoj se jam palë me ju?
Unë kam bindjet e mia, dhe do të qëndroj deri në fund bashkë me grupin parlamentar, sepse luftojmë për fëmijët tanë. Mos bëni propagandë të dalë boje tashmë”, u shpreh Hajdari.
Ndërkohë, menjëherë e ka marrë fjalën kryeministri Rama, i cili i është përgjigjur Hajdarit duke i thënë se këto janë kusuret e politikës dhe nuk mund t’i ankohet askujt për zgjedhjen që ka bërë.
Fjala e Ramës:
Këtë kusur vetë e keni zgjedhur kur keni vendosur të merreni me politikë. Për fat të keq politika në këtë vend kështu e ka.
Sa i takon kusurit tuaj që ju thonë gjëra që s’doni t’i dëgjoni, më besoni që s’jeni vetëm. Por është pjesë e zgjedhjes që bëjmë. Është e drejta dhe puna juaj, nuk mund t’i ankohemi askujt. Gjithsecili ka kusurin e vet.
Sa i përket retorikës, nuk është fjalë e keqe retorika. Mos e përdorni si fjalë të keqe. Retorika është art më vete, demagogjia është fjalë e keqe.
Jeni e mirëseardhur t’i thoni idetë tuaja. Duke folur për ide, nuk është se keni thënë ide, po flisni për nevojën e idesë. Mos bëni si ata para jush, s’keni bërë asnjë rrugë. Po jua përsëris, me mandatet e qeverisë suaj janë bërë shumë tendera rrugës, por asnjë rrugë e vetme nuk është ndërtuar deri sot. Ne kemi shlyer borxhet për ato rrugët dhe na ka shkuar shumë shtrenjtë ajo rrugë-rrugë-rrugë! Pres të na sfidoni me fakte, jo me demagogji!/ Tirana Today
