Ftesa e Ramës për bashkëpunim, përfundon mbledhja e Bashës me aleatët

Përfundon mbledhja e kryetarit të PD-së, Lulzim Basha me aleatët e tij, pas ftesës së kryeministrit Rama për bashkëpunim me opozitën.

Mësohet se mbledhja u zhvillua në selinë e PD-së dhe ka zgjatur rreth një orë, ndërsa Basha nuk ka dhënë asnjë koment në lidhje me takimin për mediat. Por nga ana tjetër, aleatja e tij, Monika Kryemadhi u shpreh se qëndrimet janë të njëjta dhe do të vazhdohet me platformën e opozitës.

Në letrën drejtuar opozitës jashtë parlamentare, kryeministri Rama shkruan:

“Ju drejtohem publikisht në përpjekjen për të krijuar një hapësirë dialogu e ndërveprimi mes nesh, lidhur me një sfidë të përbashkët të një rëndësie kombëtare, Reformën Zgjedhore. Kundërshtitë tona në aspektin politik janë botërisht të njohura dhe pozicionet respektive, në raport me hapësirën institucionale të vendit po ashtu”.

Ndërkohë, kryedemokrati Basha reagoi menjëherë pas kësaj ftese, duke e quajtur si ofertë të pasinqertë.