Presidenti i Turqisë, Recep Tayyip Erdoğan mësohet se do të zhvillojë një vizitë zyrtare në Serbi, ku do të takohet me homologun serb, Aleksandar Vuçiç, dhe me zyrtarë të tjerë.
Sipas mediave serbe, Erdogan pritet ta vizitojë Serbinë më 29 gusht, ndërsa qëllimi i kësaj vizite besohet të jetë nisja e punimeve për ndërtimin e autostradës Beograd-Sarajevë.
Kompania turke Tasyapi dhe vetë shteti turk financojnë një pjesë të konsiderueshme të këtij projekti, që kap vlerën e 3 miliardë eurove.
Serbia i ka dhënë viteve të fundit rëndësi të madhe ndërtimit të autostradave që e lidhin me korridoret evropiane, siç është ky projekt i fundit. Me autostradën drejt Sarajevës, Serbia do të lidhet me korridorin 5 që nis në Bosnjë-Hercegovinë, për të kaluar në Kroaci dhe për të përfunduar në Hungari.
Kujtojmë që Erdogan e ka vizituar Serbinë për herë të fundit, në tetor të vitit 2017.
