Opozita prej disa muajsh ka braktisur Parlamentin duke djegur mandatet e deputetit dhe ka vërshuar në rrugë për të protestuar. Deri tani PD, LSI dhe aleatët kanë organizuar 5 protesta kombëtare, të cilat janë mbajtur para Kryeministrisë dhe Parlamentit, ndërsa e fundit ishte një marshim protestë duke trokitur në dyert e 5 institucioneve të inkriminuara sipas opozitës.
Protesta e 11 majit ishte edhe protesta më e zjarrtë, pasi pati përplasje të ashpra mes policisë dhe protestuesve. Këta të fundit sulmuan godinën e Kryeministrisë me bomba molotov, mjete piroteknike dhe bojë, ndërsa policia nga ana tjetër u përgjigj me ujë dhe gaz lotsjellës. Kjo ishte edhe protesta që ka pasur përplasje më të forta, nga të cilat u plagosën lehtë disa efektivë policie dhe disa protestues.
Sipas burimeve të Tirana Today, Ministria e Brendshme ka vendosur që policët të cilët ishin në terren në protestën e 11 majit të marrin dëmshpërblim një rrogë, për shkak të rrezikut dhe vështirësive që u përballën.
I njëjti burim tha se: “Policët të cilët kanë qenë në terren në protestat më parë nuk janë dakord me këtë vendim. Ata kanë propozuar që efektivët që u përballën me protestuesit më 11 maj të mos u jepet një rrogë e plotë dëmshpërblim, por të ndahen për të gjithë nga 100 mijë lekë (të vjetra).
Një tjetër problem që kanë konstatuar është se në listën e personave që do të marrin dëmshpërblimin në fjalë janë futur emrat e shoferëve apo të badigardëve të ministrave apo zyrtarëve të tjerë që nuk iu takon shpërblimi.” / TIRANA TODAY
