Grupi hetimor ka dyshime të forta se atentati me minë të telekomanduar që ndodhi në mes të Tiranës, ka ndodhur për shkaqe hakmarrje. Autorët kishin për synim që të eleminonin 50-vjeçarin Preng Gjini, i cili mbeti i plagosur rëndë.
Mbrëmjen e së martës, në kryeqytet u dëgjua një shpërthim i fuqishëm. Një makinë tip “Mercedez Benz” ishte hedhur në erë nga një minë e telekomanduar, duke u dëmtuar në pjesën e përparme.
Lidhur me këtë ngjarje, ka dëshmuar në polici Fatjon D., djali i hallës së Preng Gjinit. Ai është pronari i makinës ku ishte vendosur bomba që shpërtheu nga komandimi në distancë e njëkohësisht dhe personi i fundit që ka takuar të plagosurin, 10 minuta para ngjarjes.
Fatjon D., i cili punon si agjent marketingu i një kompanie që tregton libra dhe artikuj kancelarie, ka treguar se paraditen e së hënës ka qenë në Lushnjë, ku ka dërguar disa produkte që ishin porositur dhe është kthyer sërish në Tiranë, shkruan “Panorama”.
Ai ka deklaruar se pasdite ka komunikuar me kushëririn e tij, Preng Gjini, me të cilin e kanë lënë të takohen pranë një universiteti privat, që ndodhet jo shumë larg vendit ku ndodhi ngjarja.
Gjini i ka kërkuar atij makinën (mjetin që ishte vendosur bomba) dhe pasi ka pirë kafe me të, ka lënë makinën e tij, një “Mercedez Benz ML” dhe ka hipur në makinën e kushëririt, e cila shpërtheu 10 minuta më pas.
Siç ka deklaruar Fatjon D. për grupin hetimor, Gjini ishte kthyer nga Italia për përvjetorin e të vëllait, Armando Gjini, që u vra gushtin e kaluar. Dhe gjatë kësaj kohe që ka qëndruar këtu, lëvizte me mjetet e të afërmve, kryesisht si pasagjer. Kjo shpjegon edhe faktin pse sasia e lëndës plasëse ishte vendosur në krahun e pasagjerit.
Preng Gjini mbeti i plagosur rëndë, pasi makinës së tij iu vu tritol. Bashkë me të kanë mbetur edhe dy persona të tjerë të plagosur, të cilët ndodheshin rastësisht pranë mjetit kur ndodhi ngjarja. Preng Gjini është vëllai i Armando (Tonin) Gjinit, ish-ushtari i Met Kananit që u ekzekutua në Rrëshen.
“Shënjestra” e atentatit ishte kthyer në Shqipëri për 1-vjetorin e vrasjes të të vëllait, Tonin Gjini, i cili u qëllua për vdekje në gusht të vitit të kaluar. Por nderimet për të vëllain për pak sa i kushtuan jetën 50-vjeçarit, i cili ka pësuar dëmtime të mëdha në trup nga shpërthimi i 300 gramë C4.
