Kryeministri Edi Rama, ka komentuar vendimin e marrë në Asamblenë Kombëtare të Partisë Socialiste, ku zëvendësoi deputetin socialit Ditmir Bushati me Valdrin Pjetrin, kryebashkiakun e ri të Shkodrës, duke i hequr kështu drejtimin e qarkut të Shkodrës.
Në konferencën e mbajtur me gazetarët, Rama i ka hedhur poshtë zërat se e ka larguar se ai ishte një zë kritik. Sipas tij, qarku i Shkodrës ka një rëndësi të veçantë dhe se për të arritur ndryshimet e kërkuara atje, nevojitet një person me më shumë aftësi dhe energji.
“Mua s’më rezulton që Ditmiri të ketë bërë ndonjë kritikë shqetësuese, nuk e di ku e keni dëgjaur, mbase më ka shpëtuar edhe mua, por sidoqoftë, kjo s’ka lidhje me vendimin e marrë për të. Organizimi i ri kërkon ritme të reja, energji, aftësi që të bëjnë të mundur këto ndryshime, kaq. Valdrini do jetë edhe kryebashkiak dhe Shkodra për mua është prioritet shumë i rëndësishëm, që ka të bëjë jo me politikën dhe votat, por gjithçka mendoj për atë qytet, historinë e tij, potencialet e tij. Shkodra që kemi sot është një fatkeqësi. Pas mandatit të Valdrinit do keni një Shkodër që do të lërë të njëjtin impakt si Vlora”, deklaroi Rama.
