Tre shqiptarë janë arrestuar nga autoritetet britanike, pasi u kapën duke rritur qindra bimë kanabisi në një fermë. Nëse kjo sasi do të shitej në treg, do të kapte vlerën prej 500 mijë paund.
Në Gjykatën e Teesside u tha se shqiptarët janë detyruar të gjithë që të punojnë si “kopshtar” sepse duhet të paguanin borxhet që kishin, pasi kanë dhënë para për të ikur në Angli.
Shqiptarët e arrestuar deklaruan se ishin sjellë në Teesside për të punuar për të shlyer borxhet pasi mbërritën në Britani nga Irlanda.
Ervis Harrari 24 vjeç tentoi të largohej kur pikasi policinë, mirëpo u arrestua pak më vonë. Oficerët gjetën në vendngjarje 226 bimë kanabis. Lënda narkotike ndahej në 4 dhoma.
“Harrari i detyrohej një rumuni një shumë prej 8000 paundësh dhe kjo ishte e vetmja mënyrë që të siguronte paratë”, deklaroi avokati i Harrarit.
Po ashtu, oficerët britanikë arrestuan në flagrancë edhe Florenc Sherrin, 23 vjeç. Ky i fundit deklaroi se kishte ikur nga Shqipëria për shkak të problemeve me pronësinë dhe kërcënimeve që i ishin bërë në vendlindje.
Harrari u dënua me 16 muaj burg, ndërsa Sherri me 13 muaj heqje lirie.
Ndërkohë, arrestuari i tretë është shqiptari Haziz Bruçi, 23 vjeç, i cili u gjet brenda një prone që strehonte 213 bimë kanabis në pesë dhoma.
