Analisti i njohur Shpëtim Nazarko, i ka dhënë përgjigje pyetjes se përse LSI-ja po qëndron në heshtje pas humbjes së zgjedhjeve. I ftuar në “Ora e Betit” në Rtv Ora, ai tha se LSI-ja është në pritje të zhvillimeve brenda PD-së. Nazarko aludon se nëse fiton linja Berisha, sipas tij, do të kemi aleancë mes dy partive si në 2009.
“Basha e tha atë projektin, LSI-ja nuk i ktheu përgjigje. Pas kontratës politike para zgjedhjeve nuk pamë asnjë shenjë bashkëpunimi. Ka gjuajtur herë pas herë PD-ja, LSI-ja nuk i është përgjigjur, është brenda rolit të vetë.
Pret zhvillimet brenda PD-së, në rast se do të fitojë linja Berisha do të kemi një PD+ LSI si në 2009. Nëse nuk fiton linja Berisha, mund të diskutojmë variante të ndryshme. Nëse nuk do fillohet të bëhet opozitë me principe, me idenë. Nuk do ti thosha për rrugët, por do ta kritikoja Ramën me një gjë të thjeshtë. Shqipëria në hartë është si kjo (tregon shishen e ujit).
Një budalla e kupton që në një vend të hollë e të gjatë, do të lidhësh njëherë mesin. Kështu bëhet opozita, se opozitë që ti thuash tjetrit të pashë që vodhe atje, atë tenderin se vodhët atje po këtu, është opozitë e ca derrave të vetëkënaqur që nuk i hyn në punë popullit shqiptar”, u shpreh ai.
Pasi kreu i PD-së, Lulzim Basha, e përjashtoi nga grupi parlamentar demokrat, ish-kryeministri Berisha njoftoi nisjen e takimeve me bazën demokrate, për të zhbërë vendimin e kreut të selisë dhe rikthyer demokracinë në PD. Takimin e parë me demokratët, Berisha e zhvilloi më 16 shtator në Tiranë. Nga ajo ditë nuk është ndalur me “Foltoren” e tij dhe ka zbuluar se në 11 dhjetor do të mbledhë Kuvendin Kombëtar të Partisë Demokratike. Vlen të theksohet fakti se në të gjitha takimet që ka bërë, Berisha ka bërë thirrje për protesta të fuqishme, me qëllim rrëzimin e kryeministrit Edi Rama.
