Kryedemokrati Basha ka mbërritur i pari në selinë e PD-së, duke u drejtuar në zyrën e tij ku ka planifikuar një ditë normale pune me mbledhje dhe takime. Nga ana tjetër në parkingun e selisë blu kanë nisur të afrohen një numër i madh automjetesh, të cilat janë parkuar njëra pas tjetrës, duke zënë pjesën më të madhe të hapësirës.
Një foni po vendoset në tarracën e selisë së Partisë Demokratike. Mësohet se bokset po vendosen nga përfaqësues të Bashës.
Berisha iu drejtua dje selisë, dhe teksa është pyetur për protestën, ka treguar se si do e nxjerr Lulzim Bashën nga zyra. “Me pekule do e nxjerrim”, deklaratë e cila shkaktoi humor. I pyetur se me çfarë mjetesh do të përdorin për të arritur qëllimin, Berisha tha se do të përdoren vetëm mjete paqësore. “Mjete teknike paqësore, nuk do ta gjuaj kush me mjete luftarake. Këtu midis nesh nuk ka dhe nuk do të ketë njerëz të armatosur”, shtoi lideri historik i PD.
Dje, në një konferencë për mediat, kreu demokrat u shpreh se ish-kryeministri po kërkon destabilizim, shkatërrimin e partisë si dhe po përdor demokratët si fasadë. Basha tha se Berisha ka mobilizuar kriminelë e trafikantë, për të marrë partinë me dhunë, pasi kjo është mënyra e vetme se si ai i bën gjërat.
