Është mbajtur sot seanca dëgjimore për shtetasin Mihal Kokëdhima, i arrestuar pasi goditi me sende të forta fugonin e një grupi spanjollësh që kishin drekuar në restorantin e tij.
Turistët u shfaqën të pakënaqur sa i përket shërbimit në restorantin e Kokëdhimës, ndërsa ky i fundit shpërtheu në dhunë ndaj tyre.
Mësohet se i pandehuri përfaqësohej nga dy avokatë në seancë, teksa gjyqtari i çështjes është Esmerilda Habilaj.
“Më morën zvarrë me makinë. Ç’është kjo punë nuk kam prekur njeri me dorë. Ku kanë faktet që i preka me dorë. Më rrëzuan në Qeparo, nga makina. Unë nuk e theva xhamin për t’i dëmtuar por për t’u mbajtur.
Unë u mora targën, telefonova policinë. Ata futën marshin të më shtypnin, dhe unë u hodha ne kriskot. Kam dy fëmijë në shkolle në Gjermani. Ne dy muaj punojmë. Më lini të punoj”, ka thënë Kokëdhima.
Avokatët mbrojtës kanë kërkuar masë sigurie më të butë, duke ofruar edhe garanci pasurore deri në 3 mijë euro. Sipas avokatëve, asnjë nga akuzat nuk qëndron për ta mbajtur prapa hekurave, ndërsa shtojnë se nuk rrezikshmëri shoqërore.
Kokëdhima u arrestua tri ditë më parë nga policia dhe akuzohet për “Kanosje”, “Dëmtime të tjera me dashje” dhe “Shkatërrimi i pronës”.
