Me 19 të lënduar, mes tyre protestues, efektivë të policisë, gazetarë, si edhe me dëme materiale në godinën e Kryeministrisë dhe në afërsi të saj. Ishte ky bilanci i protestës së opozitës këtë të shtunë. Në protestën e cila zgjati 5 orë, protestuesit tentuan të hyjnë brenda Kryeministrisë.
Duke thyer xhamat e derës së godinës, duke i vënë flakën pemëve dhe shkatërruar statujën e kërpudhës. Kjo gjë bëri që Garda e cila ndodhej brenda si dhe në tarracë t’i përgjigjej me gaz lotsjellës.
Por, edhe pse ishin vetë protestuesit ata të cilët në fillim thyen kordonin e policisë e u drejtuan tek Kryeministria, ata thonë për Tirana Today se nuk ishin ata që ushtruan dhunë.
“Nuk kishte dhunë fare, nuk është dhuna ajo te dera e Kryeministrisë, 1 milion lekë ajo dhe populli e financon. Ne erdhëm për protestë dhe jo për të helmuar njerëzit.”
“Nuk ishte aspak rrëmujë, madje përkundrazi ishte një ndër protestat më paqësore. Nuk kishte asnjë lloj dhune, kjo është një protestë dhe ju mos mendoni se protesta është puthje në faqe. Ajo duhet ta tregojë disi veten, populli duhet ta shpreh atë pakënaqësinë që ka. Këtu dhuna erdhi veç nga policia, kryesisht nga njësitë speciale operacionale që ishin mbi tarracë.”
Teksa policia hodhi me dhjetëra bomba molotov për të shpërndarë demonstruesit, një nga protestuesit i mblodhi ato me qëllim dërgimin në Prokurori. Pasi sipas tij, policia ka rrezikuar shëndetin e qindra qytetarëve.
“Mua më kanë rënë të fikët 4 herë nga gazi që hidhte policia. Kjo është dhunë ndaj popullit, pasi u prekën më shumë se 300 shqiptarë që ishin aty në shesh. Unë kam 10 vjet që nuk ha bukë, jam gati t’i dal plumbit para jo më Edi Ramës që nuk çaj kokën fare. Ky paska qenë ‘qen bir qeni’. Dhe thashë më mirë para ta heq Edi Ramën prej fytit. Se pa vrarë Edi Ramën unë nuk e vras veten. Ne nuk duhet të djegim vetëm Kryeministrinë, por të marrim nga një levë e të vrasim dhe policët,”-shprehet ai për Tirana Today.
Ndërkohë, në orën 16:00, kryedemokrati Basha pasi u takua me Berishën e Kryemadhin, bëri njoftimin e mbylljes së protestës. Duke falënderuar pjesëmarrësit, ai tha se kryengritja do të vazhdojë javën e ardhshme, ditën e enjte, në orën 10:00. Duke mos bërë komente për rrëmujën e krijuar. Por, protestuesit paralajmërojnë më shumë trazira në 21 shkurt.
“Të enjten do të jetë më e fortë, do të ketë më shumë rrëmuja. Do të ketë se atë që po na bën ai, e meriton dhe ne jemi të justifikuar, ndaj të përgatiten.”/ TIRANA TODAY
