Ministri i Jashtëm në detyrë, Gent Cakaj, ka reaguar pas refuzimit të negociatave, duke u shprehur se pavarësisht se vendet e BE nuk ranë dakord, vendi do të vazhdojë reformat.
Përmes një postimi në Facebook, Cakaj deklaron se dështimi për të hapur negociatat nuk erdhi si pasojë e progresit të vendit por si pasojë e vizioneve të ndryshme për reformën strukturore të Bashkimit Evropian.
Postimi i plotë:
Mungesa e konsensusit në Këshill për çeljen e menjëhershme të negociatave për anëtarësim me Shqipërinë nuk vjen si rrjedhojë e interpretimeve kundërthënëse lidhur me progresin e vendit, por si pasojë e vizioneve të ndryshme për reformën strukturore të Bashkimit Evropian në përgjithësi.
Përderisa nuk ka një ujdi absolute për të filluar bisedimet për anëtarësim me Shqipërinë dhe Maqedoninë e Veriut, ekziston një pajtueshmëri e plotë se të dy vendet kanë përmbushur të gjitha kushtet e paraqitura në konkluzionet e qershorit të vitit 2018.
Pavarësisht kësaj, Shqipëria do të vazhdojë angazhimet e saj reformatore dhe përpjekjet e mëtejme në shërbim të aspiratës evropiane.
