Ish-kryeministri Berisha u ndal dje në Shkodër, duke mbajtur takimin e radhës për të fituar mbështetjen e bazës në luftën kundër Bashës. Berisha në këtë takim nuk pati asnjë deputet apo personalitet të ri krah tij.
Jozefina Topalli që pritej të shfaqej aty, nuk ishte e pranishme. Aty mungoi edhe kryetarja e Bashkisë dhe funksionarja më e lartë e PD në Shkodër, Voltana Ademi, por edhe emra të njohur të demokratëve në kryeqendrën e veriut si Bardh Spahia, kreu i PD Shkodër, Xhevdet Amulli, por edhe vetë Jozefina Topalli, e cila në vend të saj kishte deleguar të bijën. Në krah të Berishës u shfaqen mbështetësit e përhershëm nga Tirana si Flamur Noka, Klevis Balliu, Aldo Bumçi dhe Gent Strazimiri.
Nga ky takim, Berisha lëshoi sërish mesazhe kërcënuese dhe shantazhuese ndaj Bashës. Sali Berisha ka kërcënuar Lulzim Bashën se për të ka shumë dokumente ,që faktojnë biseda të ndryshme me të në zyrë për çështje të ndryshme.
“Në këtë iPad kam shumë dokumente, që faktojnë se Lulzim Bashës i kam thënë në zyrën time shumë gjëra. Ato gjëra që keni kërkuar ju. Unë këtu kam shumë dokumente, unë mund të faktoj shumë gjëra që i kam thënë Lulzim Bashës në zyrë ato që i keni kërkuar dhe ju, dhe e kam kritikuar.
I kam kërkuar të japë dorëheqjen në 2017, kam thënë se kryetari duhet të jepte dorëheqjen. Por nuk kam ndërhyrë në problemet e brendshme të partisë, dhe nuk kisha projekt për rikthimin në krye. Po të hyja pa projekt, vetëm se shkaktoja kaos. Por a ishte e drejtë të mos ndërhyja në problemet e PD? S’e kam sulmuar kurrë publikisht. Ky është gabimi im”, tha Berisha.
