Avokati Spartak Ngjela, është shprehur sot se Kreu i Shtetit Ilir Meta donte që të digjej Kuvendi. Ngjela ka dhënë një deklaratë të fortë në “Repolitix”, teksa tha se Meta i ka hedhur benzinë zjarrit me shtyrjen e zgjedhjeve. Ai shtoi se Presidenti nuk e ka në kompetencë të anulojë datën e zgjedhjeve.
“Presidenti nuk e ka në kompetencë të anulojë datën e zgjedhjeve. Presidenti nuk e rrëzon dot akuzën, se e bëri se donte t’i hidhte benzinë zjarrit. E aprovoi sot. Çështja qëndron se deri tani ne dimë se ai paska marrë një informacion, por me qëndrimin e tij na provoi se paska dashur djegien e Kuvendit”, tha Ngjela.
Meta për herë të parë informacionet që ka pasur për djegien e Kuvendit i ka treguar para Komisionit Hetimor, për shkarkimin e tij. Ai tha se vendimin për shtyrjen e zgjedhjeve e ka bërë për të shmangur një akt të tillë.
Edhe sot, në një deklaratë për mediat, Presidenti Ilir Meta përsëriti informacionin për djegien e Kuvendit, se është tërësisht i vërtetë. Ky dokument tha Meta, do ti vihet në dispozicion Komisionit Hetimor, sipas ligjit. Kreu i Shtetit ka thënë se i qëndron deklaratave të tij, dhe se ai nuk ka thënë ndonjëherë gënjeshtra.
“Sa i takon deklaratës sime se në datën 7 qershor se kam patur një informacion nga një institucion i lartë i sigurisë kombëtare, kjo është e vërtetë, unë nuk kam thënë gënjeshtër, aq më tepër në këto momente të rëndësishme. Unë nuk mund të them diçka më shumë në respekt të ligjit. Kanë dërguar një kërkesë për tu njohur me këtë informacion, edhe Presidenca do t’ja vërë në dispozicion Kuvendit. Informacioni është i vërtetë”.
