Që prej ditës së djeshme dyshohej se grabitësi i vrarë nga policia ishte Admir Murataj. Një ditë pas ngjarjes, familjarët kanë mbërritur në morg. Ka qenë bashkëshortja e Admir Muratajt ajo që ka identifikuar trupin, duke konfirmuar se i përket të shoqit.
I pranishëm për identifikimin ka qenë edhe vëllai i Muratajt, ndërsa gruaja e Admirit, Albana pas daljes nga dera e morgut është larguar në lot.
Admir Murataj ishte maskuar me paruke tullaci dhe me maskë në fytyrë, për të humbur gjurmët. Ai u qëllua nga policia me plumb në kokë, ndërsa identifikimi i tij mori kohë, pasi Murataj nuk kishte asnjë mjet identifikues me vete.
Murataj ka qenë ende në kërkim për organizimin e dy grabitjeve të bujshme atë të në Qafë-Kashar pranë Rinasit dhe grabitjen e një banke te ‘Stacioni i Trenit’ në Tiranë, ku kanë qenë të përfshirë edhe disa ish-Komando të ushtrisë shqiptare. Ai ishte personi i vetëm që ka qenë në kërkim për grabitjet e mëparshme, ndërsa në burg gjendet dhe vëllai i tij Aleksandër Murataj.
