COVID-19 në Shqipëri/ Meta mbështet këtë kërkesë të opozitës

Që prej shpërthimit të koronavirusit në Shqipëri, opozita i ka bërë thirrje herë pas here qeverisë që të rrisë numrin e testimeve.

Ndërkohë, së fundmi, Presidenti Ilir Meta përgjatë një interviste televizive theksoi se e mbështet plotësisht kërkesën e opozitës për rritjen e numrit të testeve për COVID-19.

“Vlerësoj se opozita ka qenë mjaft aktive gjatë kësaj kohe dhe ka dhënë mendimet e saj, madje ka respektuar kufizimet. Pra asnjëherë nuk i kanë kundërshtuar kufizimet si masë mbrojtëse për shëndetin e qytetarëve. Kërkesa e tyre për shtimin e testimeve ka qenë një kërkesë tërësisht e drejtë”, tha Kreu i Shtetit.

Në vijim, Presidenti deklaroi se institucionet duhet të bëjnë përpjekje më të mëdha për të mbrojtur bizneset dhe punonjësit gjatë situatës së pandemisë:

“Jemi në një situatë të vështirë të një fatkeqësie, që duhet përballuar me masa të përgjegjshme dhe efikase, me një balancë midis shëndetit publik dhe mbrojtjes së ekonomisë kombëtare e të qytetarëve shqiptarë.

Të bëhen përpjekje më të mëdha për të mbrojtur bizneset dhe punonjësit e tyre që rrezikojnë të humbasin vendet e punës”.