Një ditë pas përjashtimit të Sali Berishës nga grupi parlamentar i PD-së, kryedemokrati Lulzim Basha ka mbledhur grupin parlamentar të PD-së për ‘porositë’ e fundit. Basha i është drejtuar selinë blu, ku për rreth 30 minuta do të diskutojë me të zgjedhurit e rinj të kësaj force, ku do të japë direktivat e fundit pak para nisjes së seancës plenare të Kuvendit.
Ish-lideri i PD-së, Sali Berisha, s’do të hyjë në Parlament si pjesë e grupit parlamentar të demokratëve, por si deputet i pavarur. Sot nis seanca e parë parlamentare për sesionin e ri në Kuvendin e Shqipërisë. Që prej shpalljes së këtij vendimi, pati një reagim nga mbështetësit e PD-së, të cilët kanë paralajmëuar një protestë para selisë blu.
Sakaq, kreu i Këshillit Kombëtar të PD-së Edi Paloka, ka mbërritur pak minuta më parë pranë banesës së ish-kryeministrit Sali Berisha, edhe pse në selinë blu Lulzim Basha ka thërritur mbledhjen e grupit parlamentar, pak përpara se në Kuvend të nisë seanca e parë parlamentare.
Me këtë lëvizje të tij, Paloka duket se zyrtarizon qëndrimin kundër vendimit të Lulzim Bashës, për përjashtimin nga grupi parlamentar të ish-kryeministrit Sali Berisha.
Ky i fundit pritet që të mbërrijë sot në Kuvend i shoqëruar nga një grup mbështetësish, ndërkohë që dje hodhi idenë dhe për një lëvizje të re politike.
