Ish-kryeministri Berisha është futur i vetëm në oborrin e Kuvendit, ku është pritur te dera e automjetit nga Edi Paloka, Flamur Noka dhe Tritan Shehu. Berisha tha në një prononcim të shkurtër për mediat, se kryeministri Rama dhe kryedemokrati Basha kanë një marrëveshje me njëri-tjetrin, dhe se ai tashmë do të punojë për të rikthyer legjitimitetin e PD.
Sakaq, deputetja më e vjetër në Kuvend, Luljeta Bozo, ka hapur seancën e parë të legjislaturës së 10 parlamentare. Në fjalën e saj, ajo theksoi se kjo legjislaturë do të mbahet mend gjatë për shkak të numrit të lartë të grave e vajzave. Po kështu i ka kërkuar deputetëve socialistë e demokratë, të punojnë pa ngjyra partiake.
“Pas një karriere të gjatë profesionale, kam nderin të hap legjislaturën e 10 parlamentare. Ndihem e emocionuar pasi kurrë më parë kjo sallë e nderuar s’ka pasur kaq shumë vajza e gra në radhët e saj. Jam jo vetëm krenare për këto arritje, por kam bindjen e thellë se kjo legjilsaturë do të mbahet mend gjatë për thyerjen e barrierave e stereotipeve gjinore, forcimin e rolit të gruas.
Kemi marrë përgjegjësi të madhe, për misionin historik, për ta çuar Shqipërinë drejt Europës. Për të krijuar një Shqipëri që brezat që vijnë ta adhurojnë. Mbështetës potenciale në këto reforma mbeten SHBA, aleati ynë më i fuqishëm, BE etj. Na besuan për të çuar drejtësinë përpara, administratën, për aq sa mundemi çështjen e pronave, arsimin, shëndetësinë, ekonominë në të gjitha degët e saj, bujqësinë, energjetikë, arti dhe kultura, pa hequr vëmendjen. Sot Shqipëria nuk është më shprehje gjeografike. Shtëpia jonë e përbashkët është strehë e mirë për këdo.
Ne vijojmë të ndodhemi para dy sfidave që kanë të bëjnë me rimëkëmbjen, tërmetin e pandeminë. Ne të gjithë së bashku do ia dalim. Zonja e zotërinj. Populli na zgjodhi me votën e tij, të punojmë pa parë ngjyra partiake.
Të kryejmë me sukses punën e nderuar të deputetit. Paçim punë të mbarë të gjithë, të majtë e të djathtë. Ne punojmë për të mirën e vendit tonë. Në këtë proces do të kemi mbështetjen e shqiptarëve. Punë të mbarë të gjithëve”.
