Një ndër shqetësimet që kanë shqiptarët gjatë këtyre ditëve të izolimit është në do paguhen, dhe si do të vijojë situata në muajt në vijim. Për shumë familje, mbijetesa është falë rrogës mujore. Por kryeministri Rama nuk e ka lënë në harresë këtë çështje mjaft jetike për çdo shqiptar.
Ç’do të ndodhë me rrogat e qytetarëve që punojnë në sipërmarrje private? Kryeministri Edi Rama, gjatë një konference për shtyp, ndër të tjera foli edhe për këtë çështje. Ai tha se askush nuk e di se sa do të zgjasë kjo luftë, ndërsa e tërë bota po vuan pasojat e këtij virusi vdekjeprurës.
“Askush s’e di sa do të zgjasë kjo luftë, por çfarë dimë është që po kaq gafil edhe fuqitë më të mëdha ekonomike dhe teknologjike të globit.
Padiskutim kjo nuk do të thotë që ata që kanë për të marrë një rrogë në fund të muajit në ato hallkat e ekonomisë që janë këputur, ne do i lëmë në dorë të pronarëve të sipërmarrjeve private.
Në asnjë mënyrë, sipërmarrjes nuk mund t’i delegohet mandati i solidaritetit shoqëror që zgjedhësit ja kanë dhënë qeverisë që unë drejtoj, dhe më kanë besuar mua kryqin kur e kanë vendosur në krah të fletës së votimit.
Ne do të kemi kështu shpejt brenda kësaj jave planin e garancisë financiare, për pagat e të gjithë atyre që lanë punën dhe u futën në llogoren e shtëpisë”, u shpreh Rama, i cili shtoi gjithashtu se është e pamundur për ekonominë e vendet që fabrikat të mbahen të mbyllura.
Për kreun e qeverisë, izolimi është rruga e vetme për të parandaluar përhapjen e koronavirusit.
Prej ditësh është ndaluar transporti publik dhe qarkullimi me makina private. Dje pas vendimit të Ramës për të mos ecur në rrugë pas orës 18:00, i ka detyruar qytetarët që të qëndrojnë brenda. Por edhe këtë herë, qytetarët janë bindur. Në kryeqytet, me dhe pa dëshirë qytetarët u detyruan të ngujohen në shtëpi pas këtij orari.
