Ish-ministri i Jashtëm, Ditmir Bushati ka deklaruar se sot jemi më pranë se kurrë procesit të anëtarësimit të vendit në BE.
Ndër të tjera, Bushati vlerësoi raport-progresin e Komisionit Evropian për çeljen e negociatave, ndërsa shtoi nga foltorja e Kuvendit se politika shqiptare ka kultivuar kulturën e poshtërimit të kundërshtarit.
“Zoti Balla e përmendi që ka 14 vjet në këtë sallë, dhe unë kam 10 vjet dhe më erdhi keq kur pashë dje regimet e opozitës. Ato ishin paqyrë e kulturës së dëshpërimit. Ne të gjithë së bashku kemi kultivuar kulturën e poshtërimit të kundërshtarit. Po kështu vjet në 2018 kemi bërë një debat të madh me opozitën këtu në Parlament. Dhe për fat të keq harrojmë se përpara partive është Shqipëria, atdheu ynë. Qeveria në këtë proces ka thjeshtë detyrën e përgjegjësisë. Merita është vetëm e shqiptarëve. Në raport evidentohen disa probleme që nuk mund ti përmbushë mazhoranca pa opozitën.
“Është koha për një mirëkuptim më të mirë politik. Unë kam hyrë në 2009 në politikë, ditën kur qeveria Berisha aplikoi për anëtarësimin në BE. Shumica e heshtur e këtij vendi kërkon dialogun dhe mirëkuptimin. Kërkon një Shqipëri që bazohet te ekonomia e dijes. Shqiptarët kërkojnë një kapitalizëm progresi, dhe jo që bazohet te politikat grabitqare. Kjo është arsyeja që shqiptarët kërkojnë anëtarësimin në BE. Kjo është arsyeja që ne socialistët shtrijmë dorën për opozitën, për të kapërcyer çdo ndasi politike. Ne jemi të ndërgjegjshëm që Shqipëria europianë kërkon një tjetër përgjegjësi”, tha Bushati.
