Kryetari i Partisë Demokratike, Lulzim Basha ka zhvilluar ditën e sotme një takim me qytetarët e Fierit.
Ai ka shpërndarë në Facebook një video, ku shihet teksa bisedon me pjesëtarët e një familjeje. Ata i shprehën Bashës të gjitha vështirësitë që ata kanë dhe problemet me të cilat hasen.
“A është jetë kjo, të marrësh bukë me listë në 2020?”, i thotë një nga gratë, ndërkohë që të tjerat i kujtojnë mungesën e punës. Ndërsa më të moshuarat ankohen se në 7 vite nuk u kujtua kush për pensionet.
“Këta nuk kanë zemër për t’i kuptuar problemet tuaja, e kanë mendjen vetëm për të zhvatur”, thotë Basha.
Postimi i plotë:
Me nënat dhe gratë fierake që rrisin fëmijët dhe mbajnë shtëpinë duke u përballur përditë me varfërinë dhe padrejtësitë që rriten. Edhe pse në kushtet e mbijetesës, ato janë me kurajo dhe dinjitet, por edhe me shpresë se #DiteMeTeMira do vijnë për to dhe për familjet e tyre. Sepse fierakët dhe gjithë shqiptarët meritojnë të nesërme më të mirë.
#PotëDëgjoj.
