Ish-kryeministri Sali Berisha dhe kryetarja e Lëvizjes Socialiste për Integrim, Monika Kryemadhi duket se nuk janë tërhequr nga skenarët rusë për të destabilizuar vendin. Të shtunën opozita do të zhvillojë protestën e 6 kombëtare kundër qeverisë para Kryeministrisë, ku për disa nga demokratët shihet si vendimtare.
Por gazeta ka mësuar se presionet ndaj kreut të Partisë Demokratike, Lulzim Basha janë rritur ndjeshëm si nga ana e ish-kryeministri Sali Berisha, ashtu edhe nga njerëzit e tij në bazë, por edhe LSI. Sipas informacioneve, Berisha dhe njerëzit e tij, kanë kërkuar nga Basha që në këtë protestë duhet me patjetër të ketë kaos, ndërsa i kanë vënë si kusht rrëzimin e Ramës. Në protestën e 11 majit, Kryeministria dhe Parlamenti u përfshinë nga flakët, si pasojë e sulmeve me bomba molotov.
Mirëpo, mësohet se Berisha nuk ka mbetur i kënaqur nga kjo protestë. Dhe për këtë arsye ka kërkuar që të aplikohen skenarët rusë, me qëllim çuarjen e vendit në zgrip. Ndërkohë, gazeta ka mësuar se në të njëjtën linjë me Berishën është rreshtuar edhe Kryemadhi, e cila mbështet gjithashtu protestat e dhunshme, sikundër janë ato me skenarë rusë. Janë dy arsye, të cilat kanë irrituar tej mase ish-kryeministrin dhe kryetaren e Lëvizjes Socialiste për Integrim. E para ka të bëjë me faktin se opozita ka protestuar disa herë, por pa prodhuar rezultat, sikundër është rrëzimi i qeverisë. Ndërsa e dyta ka të bëjë me ndryshimin e kursit nga ana e Bashës, i cili nuk është dakord me kërkesat e Berishës dhe Kryemadhit për të shkaktuar dhunë gjatë protestave. Madje, këtë gjë kryedemokrati e pohoi edhe dy ditë më parë gjatë një prononcimi për mediat, teksa ndodhej në Londër, kur theksoi se ai është kundër dhunës në protesta dhe se i dënon ato. Por këto, kanë alarmuar tej mase Berishën, i cili është hedhur në sulm, duke mobilizuar njerëzit e tij në bazë dhe i porositur që të shtunë të shkaktojnë dhunë gjatë protestës, pasi sipas tij, ky tubim shihet si i fundit për të. Kjo për faktin se në qershor nis fushata zgjedhore dhe zhvillimi i protestave të opozitës në të njëjtën kohë me fushatën mund të çojë në një përplasje mes militantëve të PD-LSI dhe atyre të mazhorancës.
Opozita proteston në të njëjtën kohë me serbët
Interesant është fakti se paralelisht me protestën e opozitës shqiptare, do protestohet edhe në Beograd nga ana e opozitës serbe. Madje, sipas informacioneve mësohet se edhe protesta e opozitës serbe jo vetëm që do të zhvillohet në të njëjtën ditë me atë të opozitës shqiptare, por edhe në të njëjtën orë, sikundër është ora 19:00 e mbrëmjes. Kjo tregon qartë se ka një koordinim mes dy opozitave, të cilat mbështeten fuqishëm nga Moska. Pra, në kushtet kur Shtetet e Bashkuara të Amerikës dhe Bashkimi Europian kanë dhënë alarmin se Rusia po përpiqet të shtrijë ndikimin e saj në Ballkan, Moska ka hedhur sytë nga protestat e opozitës, të cilat i shfrytëzon për të shkaktuar destabilitet në rajon, me qëllimi që të forcojë pozitën e saj në këto vende.
Policia përgatitet për skenarë dhune
Protesta e opozitës ka vënë në lëvizje edhe Policinë e Shtetit. Kjo e fundit ka hartuar edhe një plan masash për mbarëvajtjen e protestës dhe izolimin e elementëve kriminalë, që pritet të shkaktojnë dhunë gjatë këtij tubimi. Sipas informacioneve, në gatishmëri gjatë protestës pritet të angazhohen më shumë forca policie se herët e tjera. Mësohet se perimetri i sheshit përreth Kryeministrisë, por edhe Parlamentit do rrethohet me kordon hekuri, ndërsa pjesa e pedonales do të bllokohet me kordon me skela, me qëllim bllokimin e militantëve të opozitës, në mënyrë që të mos tentojnë të mësyjnë brenda godinave qeveritare. Po ashtu, sipas informacioneve policia pritet që t’i veshë dyert e Kryeministrisë me llamarinë, në mënyrë që protestuesit e dhunshëm ta kenë më të vështirë për të hyrë brenda godinës. /Gazeta SOT
