Për kreun e qeverisë, Edi Rama, beteja në PD bëhet për interesa vetjake. Pas përfundimit të mbledhjes me Kryesinë e Partisë Socialiste, Rama ka shprehur qëndrimin e tij sa i takon vendimit të Kryesisë së Partisë Demokratike që përjashtoi Sali Berishën dhe 8 anëtarë të tjerë nga partia. Rama i mëshon faktit se kjo që po ndodh mes palëve është një kacafytje që asnjëri mos lëshojë tjetrin, pasi po ra njëri, bie dhe tjetri.
“Kjo është për të qarë dhe për të qeshur, por nuk mund të qaj gjatë gjithë kohës për gjendjen dramatike ku është opozita dhe ndonjëherë edhe mund të qeshim. Nuk më rezulton që ka pasur anëtarë të Kryesisë së PS-së që kanë dashur të marrin këtë godinë me dhunë, edhe nuk me rezulton qe të kemi ndërtuar fortifikime në ndërtesë për t’u mbrojtur ndaj tyre dhe ne jemi të gjithë bashkë.
Nuk jemi në një proces kacafytje për interesa vetjake siç janë dy kufomat e PD-së që kanë marrë peng të gjithë demokratët, duke u kacafytur me njëri-tjetrin. Është një kacafytje që asnjëri mos lëshojë tjetrin, se po ra njëri bie dhe tjetri”, tha Rama.
Kryesia e Partisë Demokratike ka zhvilluar mbrëmë një mbledhje maratonë e cila ka zgjatur deri në orën 03:30 të mëngjesit të sotëm. Kryesia e PD bëri publike listën me emrat e figurave të selisë blu që do përjashtohen përgjithmonë nga kjo forcë politike.
I pyetur nëse mazhoranca sheh mundësi për të bashkëpunuar me opozitën në këto kushte, kreu i qeverisë tha se kjo mbetet për t’u parë, pasi “nuk dihet më se kush është kush.”
Megjithatë, ai shtoi se për sa kohë deputetet demokratë janë legjitimë, sepse janë në Parlament me votën e zgjedhësve, mundësitë mund të krijohen.
“Të dy këta përfaqësues të mbetur nga e shkuara në këmbë, nuk kanë asnjë legjitimitet veç e veç. Deputetët e PD, janë legjitimë sepse janë aty me votën e popullit. Kur shohim që ka shans për bashkëpunim, jemi aty për ta bërë këtë. Situata është e vështirë për momentin..do të shohim si do të zhvillohet. Uroj që të ketë një zgjidhje paqësore. Uroj që dhuna dhe fortifikimet të mbeten pas”.
