Pas një mbledhje ‘kokë më kokë’ me aleatët, kreu i Partisë Demokratike bëri të ditur se opozita do të nisë protestat në mbarë vendin. I pyetur nga mediat se si do të organizohet protesta, pasi vendi ndodhet në një situatë emergjente për shkak të pandemisë, kryedemokrati konfirmoi se do të marren të gjitha masat.
“Aty ku sot u dhunua Teatri, u përgatit flijimi i lirive të çdo qytetari. Synimi ynë është që këtë zemërim që e ndjemë të gjithë sot, në shpirtrat tanë, rruga për ta shporrur këtë bandit është me votën masive. E kuptoj këtë frustim, është frustimi jot, me siguri je pa gjumë. Prandaj të lutem shumë më jepni pak mirëkuptim. Do të organizojmë një rezistencë mbarëpopullore. Do të zhvillojnë protestat, duke respektuar kushtet higjenike. Do t’i bëjmë thirrje qytetarëve për të protestuar kundër këtij rregjimi, ne sot jemi krah çdo qytetari që dhunohet”, tha ai.
Basha ka premtuar protesta të reja nga opozita e bashkuar, disa orë pas shembjes së godinës së Teatrit Kombëtar. Ai tha se opozita do të mbështesë për protesta edhe Aleancën për Mbrojtjen e Teatrit.
“Dita e sotme është një shembull i keq, se vendi drejtohet nga një kriminel që ka marrë peng kulturën dhe shpirtin e shqiptarëve. Kemi ekspozuar lidhjet me krimin dhe korrupsionin. Nga kjo pikëpamje, e sotmja është një aferë e radhës. Rama për xhepat e tij ka sakrifikuar mirëqënien e shqiptarëve. Si sot tre vjet më parë u ula me këtë njeri, me shpresën dhe besimin se forcat politike mund ta arrinin këtë marrëvëshie.
Koha tregoi se u gabova. Garantoj shqiptarët se ky gabim nuk do të përsëritet më kurrë. Vendimi i parë është mbështetja për të gjitha protestat nga ana e Aleancës dhe nisja e protestave nga opozita. Nis me një efekt të menjëhershëm”, u shpreh Basha.
