Kreu i Partisë Demokratike, Lulzim Basha ka kërkuar bashkimin e elitës me opozitën për t’i dhënë fund këtij regjimi që sipas tij po shkatërron Shqipërinë.
Këtë ftesë, Basha e bëri në aktivitetin “Arti në mbrojtje të demokracisë dhe interesit kombëtar”, i cili u organizua nga PD dhe Aleanca në Mbrojtje për Teatrin.
“Interesi i kësaj tryeze shkon përtej diskutimit të problemi akut të shtruar për zgjidhjen. Është shprehje e vullnetit, dëshirës dhe ftesës që së bashku me elitën intelektuale të vendit të krijojmë një hapësirë të lirë, të pakufizuar dialogu me opozitën, në një bashkëveprim që shkon përtej interesave, ka si synim përmes kritikave të shtrojë një zgjidhje jo vetëm të kësaj krize por në mosrënie të përsëritjes në një cikël krizash”, tha kreu i PD-së.
Më tej, Basha fajësoi kryeministrin Rama si shkaktar të një krize me dimension të thellë psikologjik, regjimit të cilit i duhet dhënë fund, për mbrojtjen e teatrit por jo vetëm, për të ardhmen e shqiptarëve:
Shkaktuan këtë krizë me një dimension të thellë psikologjik, duke sjellë një emigrim të madh dhe vrasjen e shpresës. Ne duhet ta ndalim këtë. Opozita, PD dhe unë jemi të vendosur që këtë betejë të mos e shohim thjesht si largimin e shkaktarit të këtij regjimi, por për t’i dhënë fund çdo mundësie për pengmarrje nga interesa oligarkike. Ka ardhur koha që me rastin e kësaj krize, të gjithë bashkë dhe elita të japë kontributin e saj dhe t’i japim fund këtij tranzicioni të zgjatur./ Tirana Today
