Kreu i PD-së, Lulzim Basha ka zhvilluar një takim zyrtar me kryeparlamentaren e Kosovës, Vjosa Osmanin.
Pas takimit, dy zyrtarët kanë mbajtur një konferencë të përbashkët për shtyp. Gjatë fjalës së tij, Basha tha se mbështetja totale ndaj institucioneve të Kosovës është parimi kryesor i Partisë Demokratike.
Sipas tij, dialogu është rruga e vetme për të ecur para dhe se me rëndësi është njohja e Republikës së Kosovës.
“Garantoj se për ne është e qartë si drita e diellit se ndihma më e mirë që Shqipëria mund të japë është mbështetja totale për Republikën e Kosovës dhe qytetarët e Kosovës, duke bërë gjithçka për ruajtjen e unitetit të Kosovës”, tha ai.
Nga ana tjetër, Osmani theksoi se në takim u diskutua për raportet ndërkombëtare.
“Një bashkërendim në politikën e jashtme ndërmjet Kosovës dhe Shqipërisë gjithnjë është treguar i suksesshëm kur ka qenë i sinqertë. E falënderova zotin Basha për qëndrimin e tij dhe zërin e tyre të çmuar kundër ideve të rrezikshme për ndryshim kufij”, tha ajo.
