Basha: Sistemi shëndetësor në kolaps, Rama lëviz me autokolonë mbrojtje

Kryedemokrati Basha, në një bashkëbisedim me gazetarët, ka vijuar me akuzat në drejtim të kryeministrit Rama. Sikundër edhe më herët, Basha tha se shqiptarët janë në një situatë të rëndë me COVID-19, ndërsa kryeministri shpërndan pamje nga takimi në Kukës, që sipas tij është me regjistrim. Kreu i PD citoi se mungesa e testimeve, është përpjekje e qëllimshme për të fshehur të vërtetën.

“Përgjegjësi i kësaj situate është zhdukur, dhe ka inskenuar me regji qendrore bredhje Tiranë-Kukës i shoqëruar nga autokolona mbrojtjeje.

Refuzon të japë përgjigje për mosblerjen e tamponëve dhe disbursimin e parave për oligarkët në kohë pandemie.

Refuzon të përgjigjet pse hap para kamerave disa herë spitalin COVID 3 dhe nuk e hap asnjë ditë për pacientët.

I fshihet pyetjes se përse nuk paguan bonusin për mjekët dhe infermierët. Asnjë përgjigje për mostestimin e mësuesve, për mospajisjen e shkollave. Sot në Kukës jetojnë 1/3 e banorëve që kishte qyteti kur Edi Rama erdhi në pushtet.

2/3 e kuksianëve janë detyruar të ikin nga vendi prej diskriminimit që u ka bërë Edi Rama në 7 vite.

Ka premtuar 300 mijë vende pune, ka larguar 500 mijë shqiptarë nga vendi. Shqiptarët e dinë se kanë përballë një gënjeshtar kronik, që u ka kushtuar qytetarëve shumë jetë.

Lëviz nëpër Shqipëri si pushtues, i pasigurtë nga shqiptarët. Largimi i tij është fillimi i ndryshimit që presin shqiptarët”, tha Basha.