Kryedemokrati Basha ka paralajmëruar masa ndëshkimore për të gjithë ata që refuzojnë vendimet e Kryesisë së PD-së, për të mbledhur Kuvendin Kombëtar më 18 dhjetor dhe jo më 11 siç këmbëngul ish-kryeministri Sali Berisha. Dje Lulzim Basha mbajti një takim në selinë blu me 71 krerët e degëve të PD-së në gjithë vendin, ku i ka njohur me vendimet e Kryesisë të marrë gjatë kësaj të hëne që kaloi, dhe situatën brenda Partisë Demokratike.
Shumica e krerëve të degëve kanë mbështetur vendimin e Bashës, dhe vetëm 5 emra i kanë dalë kundër. Në mbledhjen me 71 kryetarët e degëve të PD-së, Basha theksoi si detyrë kryesore që partia të dalë e bashkuar nga Kuvendi i 18 dhjetorit. Qëllimi kryesor është vazhdimi i betejës kundër Rames.
“Rama është kundërshtari ynë i përbashkët, pavarësisht çfarë mendojmë në këtë situatë që po kalojmë. Beteja me njëri-tjetrin nuk na çon askund. I shërben vetëm Ramës dhe patericave të tij, që po bëjnë gjithçka që beteja mes nesh të çojë në një ndarje të partisë. Ju jeni dëshmitare të kësaj”, u shpreh Basha.
Mbledhja është shoqëruar me deklarata të forta të kryetarit Lulzim Basha, kundrejt ish-kryetarit Sali Berisha, i shpallur “non grata” nga SHBA-ja. Basha ka deklaruar në mbledhje se për cilido që nuk respekton vendimin e Kryesisë për mbledhjen e Kuvendit Kombëtar më 18 dhjetor, do zbatojë statutin e partisë.
“Boll është boll, asnjë anëtar nuk është mbi statutin dhe as mbi ne”, është shprehur Basha gjatë takimit me krerët e degëve.
Ai tha se veprimet ilegjitime të Sali Berishës, tentativa për bunkerizim, dëmtimi i interesave elektorale dhe politike të PD-së, e kanë përgjigjen në statut. Basha është shprehur para drejtuesve të degëve, se do të zbatojë statutin ndaj kujtdo që shkel vendimin e Kryesisë së partisë, përfshirë këtu edhe Sali Berishën.
