Pas përplasjeve fizike të banorëve të Astirit dhe punonjësve të policisë dhe IKMT-së pak ditë më parë, Partia Demokratike ka dorëzuar në Prokurori një kallëzim penal ndaj efektivëve dhe jo vetëm.
Në një komunikim për mediat, ish-deputeti Klevis Balliu tha se padia është ngritur ndaj: Niko Brahimajt, drejtor i policisë vendore Tiranë, Ermal Kapllanajt kryeinspektor i policisë bashkiake, Dallëndyshe Bicit, drejtuese e IKMT-së si edhe Granit Korbit, përgjegjës i degës IKMT, Tiranë.
“Ky kallëzim penal është hapi i parë i premtimit të bërë ndaj banorëve. Kallëzimi penal është edhe ndaj kreut të IKMT-së. Dhunuesit e banorëve duhet të jenë para përgjegjësisë. Hapi i dytë i joni do të jetë dëmshpërblimi i banorëve”, deklaroi Balliu.
Nga ana tjetër, Sekretari për Çështjet Ligjore në PD, Çlirim Gjata tha se në padinë penale janë parashtruar të gjitha të drejtat kushtetuese të banorëve që janë shkelur.
“Në kallëzimin penal janë shkeljet ligjore e kushtetuese. Janë shkelur të drejtat kushtetuese të qytetarëve. Shpërdorim detyre për përdorimin e gazit lotsjellës ndaj banorëve”, nënvizoi ai.
