Ndonëse ne e njohim si politikane, hapat e para drejt një rrugëtimi të gjatë Arta Dade i ka nisur si prezantuese në festivalin e RTSH-së.
Dalja e saj e parë ishte në vitin 1975, kur ajo ishte vetëm 22 vjeç. Këtë detaj ajo e ka zbuluar teksa ishte e ftuar në emisionin “Opinion”, ku ka rrëfyer eksperiencën e saj si prezantuese e festivalit të 13-të të RTSH-së.
Ajo tha se numri 13 cilësohet si ters, por ia doli që ta prezantonte me sukses festivalin.
“Kam qenë në vitin 1975 në vit të tretë, më ftuan për të prezantuar Festivalin e 13-të. Pak me hezitim, sepse kishte kaluar festivali i 11-të dhe nisi ters. Perdja skenës rrëzoi mikrofonin sa do të dilja në skenë, dhe kameramani më tha “Nisi tersi”.
Nuk e di përse u zgjodha. Ndoshta pasi atë vit isha e fejuar, dhe i fejuari im punonte si inxhinier në televizion. Por kam patur dhe një eksperiencë tjetër në televizion, isha 22 vjeç dhe kam luajtur një telefilm “Shqetësimi i verës” dhe në 1989 jepja mësim anglishteje në televizion”, u shpreh Dade.
