Pamjet në fjalë nuk kanë nevojë për shumë komente. Pronarja e argjendarisë e cila mund të cilësohet heroinë, ia doli mbanë duke ia rrëmbyer armën një grabitësi në Elbasan. Grabitjet e argjendarisë tashmë janë kthyer në trend, e në të shumtën e rasteve hajdutët kapen në kohë reale. Por në këtë rast, gruaja e cila po i demonstronte unazën, ia doli t’ia merrte armën teksa ai po mblidhte çfarë të mundte. Por plani i tij dështoi në pak sekonda.
Policia arrestoi të shtunën në mbrëmje Astrit Thaçin, si personin e dyshuar për grabitjen e argjendarisë në lagjen “Aqif Pasha” në Elbasan. Ai u kap pas disa grabitjeve të kryera, duke vënë në alarm policinë. Këto janë pamjet e siguruara nga kamerat e sigurisë së argjendarisë së shtetases A.B., e cila ndodhej brenda në momentin e ngjarjes.
Astrit Thaçi, teksa fuste bizhuteritë e arit në xhepa, la në mënyrë të pakujdesshme pistoletën në banak. Këtë rast e shfrytëzon shumë mirë gruaja, e cila ia merr pistoletën dhe menjëherë largohet nga dyqani, e ndjekur nga Astrit Thaçi me vrap.
Sipas policisë, Astrit Thaçi është një grabitës serial. Astrit Thaçi i njohur ndryshe si “Skifteri i Durrësit”, personi që ka grabitur argjendarinë në Elbasan, ka rënë në prangat e policisë së Tiranës, në zonën e Kombinatit. 27-vjeçari u vu në pranga, në kuadër të një operacioni të ndërmarrë ndërmjet Policisë së Elbasanit dhe asaj të Tiranës. Ngjarja ndodhi në qendër të qytetit të Elbasanit, vetëm 20 metra larg Drejtorisë së Policisë.
“27-vjeçari, me precedent penal, i dënuar më parë 7 vite në Itali, për vjedhje me armë. Dokumentohen me prova shkencore 8 raste, nga këto 3 në Durrës, 4 në Tiranë dhe 1 në Elbasan. Sekuestrohen në cilësinë e provës materiale, arma e zjarrit, bizhuteritë e vjedhura e sende të tjera. Prej disa ditësh në qytetin e Durrësit, Tiranës dhe së fundi në Elbasan, një person, në kërcënimin e armës, kishte kryer disa vjedhje me armë e dhunë dhe disa të tjera të mbetura në tentativë.
Drejtoria Vendore e Policisë Durrës, menjëherë pas ndodhjes së rastit të parë, ngriti një grup të posaçëm hetimor për zbardhjen e ngjarjes. Si rezultat i veprimeve proaktive të kryera nga Drejtoria Vendore e Policisë Durrës, në bashkëpunim me Prokurorinë e Durrësit, mbrëmjen e datës 15 shkurt, Policia e Durrësit bëri të mundur lokalizmin e vendndodhjes së autorit të dyshuar të këtyre ngjarjeve.
Mbi bazën e provave të grumbulluara, Drejtoria Vendore e Policisë Durrës organizoi punën dhe në kuadër të operacionit “Trajektorja”, në bashkëpunim dhe në koordimin me Drejtorinë Vendore të Policisë Tiranë, Elbasan dhe Forcën e Posaçme Operacionale në Departamentin e Policisë Kriminale, bëri të mundur kapjen, në një lokal në zonën e kombinatit Tiranë, të shtetasit: A. Th., 27 vjeç, lindur dhe banues në lagjen nr. 13 Durres, i dënuar më parë me 7 vite burg në Itali, për vjedhje me armë, si dhe me precedent të theksuar kriminal në Shqipëri, për shpërndarje të narkotikëve dhe në fushën e vjedhjes me dhunë e armë”, njofton policia.