Shefi i Grupit Parlamentar të Lidhjes Demokratike të Kosovës, Arben Gashi, i ka kërkuar publikisht kryeministrit Albin Kurti që të publikojë marrëveshjen e fshehtë të Kosovës me Serbinë.
Gashi ka deklaruar se nëse diçka e tillë ekziston, ai do të jetë i pari që do të votojë kundër.
“Një element që po më duket shumë shqetësues. Ju po i referoheni një marrëveshjeje për të cilën unë as ma të voglën ide s’e kam për marrëveshjen që po flisni. Na bindni që është e rrezikshme, silleni në Kuvend. Publikoni ato fakte! Je kryeministër, je ministër i Jashtëm keni përgjegjësi, jo vetëm fjalë. Publikoni cilat janë ato fakte, unë i pari kam me e votu kundër”, u shpreh Gashi.
Kujtojmë se pak më herët, në fjalën e tij, Kurti i mëshoi faktit se mocioni i mosbesimit nuk është bërë për shkak të shkarkimit të ministrit, siç u aludua gjerësisht në media.
“Motori i këtij nxitimi s’ka të bëjë me ministrin e shkarkuar, as me tërheqjen e trupave të SHBA, por me një marrëveshje të gatshme për shkëmbim territori me Serbinë. Ky pazar presidencial e kërkon dorëheqjen e qeverisë”, theksoi Kurti.
