U bë një kohë e gjatë që kryedemokrati Basha dhe kryetarja e LSI-së, Monika Kryemadhi u kanë bërë haptazi disa kërkesa faktorit ndërkombëtarë, që të “flasin hapur për problemet që ka Shqipëria me demokracinë, me zgjedhjet e lira, me respektimin e lirive, me ndarjen e pushtetit, me drejtësinë e kapur, me mediat nën presion, etj”. Interesi i tyre ka qenë stabiliteti, dhe për të mbajtur situatën nën kontroll ata menjëherë kanë vepruar.
Burime që u lidhën për ‘360grade.al’, njoftojnë se në celularin e Lulzim Bashës dhe të Monika Kryemadhit kishin mbërritur dy thirrje telefonike nga Uashingtoni, me kërkesën e mos reagimit ndaj provokimit të kotë me gaz.
“Në një komunikim kokë më kokë dhe larg kamerave, pati një konsultë Basha-Kryemadhi, ku dhe u dakortësua mbyllja e parakohshme e protestës së parashikuar, në respekt të kërkesës së miqve nga përtej Oqeanit…”.
Mesazhi në anglisht i Lulzim Bashës ishte një përgjigje e koduar dhe në distancë për miqtë që bënë kërkesën në fjalë.
“Nuk ka demokraci pa stabilitet”, ishte mesazhi i tij, si edhe premtimi i rikthimit shumë të shpejtë në protestën e rradhës.
Të njëjtat burime njoftojnë se pas përfundimit të parakohshëm të protestës, mbërritën përsëri telefonata, kësaj radhe falenderuese, në përputhje me veprimin e lidershipit opozitar.
Në protestën e fundit, kreu i PD-së përcolli një mesazh për faktorin ndërkombëtar, që thuajse gjatë gjithë kohës, ka mbajtur një qëndrim kundër me atë të Partisë Demokratike dhe frontit opozitar.
“Dua t’u dërgoj një mesazh miqve tanë ndërkombëtarë, që na kanë mbështetur në këto 29 vite. Nuk ka demokraci pa stabilitet. Mos dëgjoni avokatët e korruptuar dhe njeriun që zhyti Shqipërinë në drogë, por dëgjoni zërin e njerëzve dhe qytetarëve të lirë të shqiptarëve”, tha Basha.
Po kështu, ai theksoi se në Evropë nuk shkohet pa zgjedhje të lira dhe të ndershme, ndërsa përsëriti paralajmërimin ndaj qeverisë Rama, se nuk do ta lejojnë të qeverisë në mënyrë mafioze vendin.
