Drejtori i Përgjithshëm i Policisë së Shtetit, Gledis Nano, ka raportuar në Komisionin e Sigurisë Kombëtare shifrat e kriminalitetit të vitit 2021, nga 1 janari deri më 31 tetor. Nano ka folur edhe në lidhje me vrasjen e 8-vjeçarit, Mateo Vasiut, nga Klodian Çalamani. Ai tha se vrasësi rezulton një person i evidentuar nga Policia e Shtetit, si një person me precedentë. Gledis Nano shtoi më tej se për Klodian Çalamanin nuk ka pas informacione, të dhëna apo kallëzime si i dyshuar për vepra penale në fushën e abuzimeve seksuale apo dhunës në familje.
“Nga këto ngjarje, veçojmë ngjarjen e datës 16 në fshatin Grecalli të Bashkisë Fier, ku u arrestua Klodian Çalamani, i cili ka vrarë me sende të forta M.V., që e kishte groposur në oborrin e banesës. Autori rezulton një person i evidentur nga Policia e Shtetit, një person me precedentë.
Gjykata e kishte dënuar me 4 vit burg për heqje të paligjshme të lirisë, dhe është liruar nga burgu i Rrogozhinës më 6 gusht 2009 për plotësim të kohës së vuajtjes së dënimit. Për këtë shtetas, ka pasur të dhëna policore se ka aktivitet kriminal në drejtim të vjedhjes së banesave, bagëtive e shpendëve në fshat. Informacione që kanë qenë pas verifikimeve.
Për autorin, pas përfundimit të dënimit nuk ka pas informacione, të dhëna apo kallëzime si i dyshuar për vepra penale në fushën e abuzimeve seksuale apo dhunës në familje”, tha Nano.
Një ditë pasi i dhanë lamtumirën e fundit të voglit të tyre 8-vjeçar, nëna, babai, vëllai i Mateo Vasiut dhe të afërm të djalit, mësynë në Gjykatën e Fierit për tu përballur me vrasësin. Ata thyen derën e aluminit, u futën brenda ambienteve të Gjykatës me thirrjen “Ku është Klodiani”.
