Monika Kryemadhi ka kujtuar 17-vjetorin e themelimit të LSI-së. Kryemadhi ka uruar përmes një mesazhi të shkurtër simpatizantët e kësaj partie, të cilët i nxit “të vazhdojnë të luftojnë”. Kryemadhi u bën të ditur simpatizantëve të LSI-së, se misioni vazhdon. Ndonëse në një kamp opozitar, beteja e Bashës dhe Kryemadhit duket se do vazhdojë në fronte të ndara. Këtë e tregoi marrja e të gjitha komisioneve parlamentare nga ana e PD-së, e cila preferoi të mos e ndante pushtetin me LSI-në.
LSI u themelua në 6 shtator të vitit 2004 nga Ilir Meta, sot president, asokohe i sapo larguar nga Partia Socialiste. Lëvizja Socialiste për Integrim u themelua si një parti e majtë, por zanafillën e saj e ka që në gjysmën e dytë të vitit 2003, kur brenda Partisë Socialiste lindi një lëvizje e iniciuar nga Ilir Meta, që u parapri nga dorëheqja e tij nga posti i zv/kryeministrit dhe ministrit të Jashtëm.
Ky akt i z. Meta u motivua nga mungesa e demokracisë së brendshme në funksionimin e partisë, si dhe nga frenimi i procesit të integrimit europian. Në prill të vitit 2005, LSI-ja organizoi për herë të parë në historinë e pluralizmit shqiptar zgjedhjet brenda partisë, sipas parimit “Një anëtar, një votë”, ndërsa Ilir Meta ishte i pari kryetar i një partie politike në Shqipëri i zgjedhur sipas këtij parimi.
Statusi
Gëzuar ditën e LSI. Për të gjithë ju djem dhe vajza, burra e gra, për të gjithë ju që e doni, keni luftuar dhe vazhdoni të luftoni për atë çfarë LSI përfaqëson.
Misioni vazhdon
