Në 38 qendrat komunale të numërimit ka nisur procesi i verifikimit të votave të subjekteve politike dhe numërimi i votave të kandidatëve për deputetë nga zgjedhjet e 7 qershorit.
Komisioni Qendror i Zgjedhjeve sipas planit operativ synon të shpallë rezultatin përfundimtar më 26 qershor e të certifikojë atë më 6 korrik.
Për të arritur këto objektiva, të hënën në mëngjes nisi procesi i numërimit në 15 komuna dhe pasdite në 23 të tjera e nuk pritet të marrë shumë kohë.
“Disa prej tyre që kanë numër më të vogël të vendvotimeve brenda 3 – 4 ditësh mund të arrijnë të përmbyllin këtë proces. Ndërkaq të tjerat duhet kohë më e madhe”, tha Valmir Elezi, zëdhënës i KQZ.
Sa i përket votës së diasporës e cila ka impakt në rezultatin zgjedhor, KQZ ka bërë të ditur se tashmë ka filluar tërheqja e pakove me fletëvotime nga mërgata që votoi në përfaqësitë diplomatike dhe me postë.
“Sipas të dhënave preliminare deri në orën 16:00 të ditës së sotme, nga më shumë se 20 kuti postare, të vendosura në shtete të ndryshme të botës janë tërhequr 84,832 pako të supozuara me fletëvotime”, u shpreh Elezi.
Sipas të dhënave të Komisionit Qendror të Zgjedhjeve për të votuar me postë ishin regjistruar mbi 104 mijë votues, ndërkohë që në përfaqësitë diplomatike votuan 22,414 shtetas, 3,144 persona ishin regjistruar si votues me nevoja të veçanta dhe 8,751 persona votuan me kusht.
Këto vota fillimisht do t’i nënshtrohen verifikimit e më pastaj do t’i bashkohen rezultatit përfundimtar.
Ndërkohë, që rezultatet preliminare nuk e nxorën një fitues i cili do të mund të formonte institucionet i vetëm. Lëvizja Vetëvendosje mori 42.9% të votave, duke siguruar 48 mandate.
Partia Demokratike e Kosovës mori 21% ose 24 mandate, pasuar nga Lidhja Demokratike e Kosovës që siguroi 17,6% apo 20 ulëse në Kuvend. Aleanca mori 7,16% të votave të qytetarëve ose 8 mandate.
Lista Serbe arriti të marrë vetëm 9 nga 10 mandatet e siguruara për komunitetin serb, pasi një ulëse mori partia e Nenad Rashiqit. Ndërsa, 10 mandatet e tjera janë të garantuara për komunitetet joserbe.
Bazuar në bashkëpunimin paraprak, Lëvizja Vetëvendosje mund të sigurojë minimalisht 9 vota nga pakicat joserbe dhe Nenad Rashiq, por që e çojnë vetëm deri në 57 deputetë.
Por, vota e diasporës do të jetë vendimtarja nëse Vetëvendosje do të arrijë të formojë qeverinë, pasi nëse vazhdon trendi i votës së diasporës që shkon deri në 80% për Vetëvendosjen, atëherë kjo e fundit siguron minimalisht dy deputetë, duke i rritur gjasat për formimin e institucioneve.
Qytetarët e Kosovës për të tretën herë brenda një viti e gjysmë votuan më 7 qershor për të zgjedhur përfaqësuesit e tyre politik.
