Në nisje të seancës së fundit plenare në Kuvend, ka pasur përplasje mes deputetit Kujtim Gjuzi dhe kryetarit të Kuvendit, Gramoz Ruçi. Deputeti Kujtim Gjuzi, ka thënë sot në fjalën e tij në Kuvend se kjo mazhorancë ka vjedhur mandatet, e ndaj i duket absurde që kërkojnë një mandat të tretë. Mjaft i prerë, ai u shpreh se mazhoranca ka kryer veprime të rënda ndaj qytetarëve, dhe ndaj nuk mund që të kërkojë një mandat të tretë. Ndër të tjera ai pyeti se pse kryeministri Rama nuk vjen në interpelancë, ndonëse ka kërkesë të tillë.
“Në seancën e kaluar ju bëra me dije që duhet të vijë kryeministri në interpelancë për ato 4 pika që kisha kërkuar. Sot nuk e shoh! Pse nuk duhet të vijë kryeministri?! E keni bërë Kuvendin të mblidhet sipas pasionit tuaj. Nuk shkon kjo! Nuk ndërtohet shteti kështu.
Pse s’duhet të vijë kryeministri në interpelancë para 8 deputetëve. Sa policë u dëmtuan? Sa 18-vjeçarë u dëmtuan, s’u dëmtuan!
Z. Kryetar, s’janë serioze këto që bëni. Ju 24 mandatet i keni vjedh, ju lumtë vidhni, prapë, por do shkoni mbrapa Gruevskit dhe ndonjë tjetri që është në Hagë tani”, tha Gjuzi.
Ndërkohë, kreu i Kuvendit iu përgjigj duke i bërë me dije se kërkesa kishte dy probleme.
“Kërkesa ka dy probleme. Kur bëhet, bëhet ose ministrit ose kryeministrit. Pyetjet që janë shtruar të gjitha për ministrin, përjashto një pyetje për kryeministrin: Pse ke shkuar te familja e të ndjerit? Sipas kësaj është antikushtetuese kjo pyetje, s’mund t’i ndalosh as kryeministrit as qytetarit se ku do vejë për ngushëllim”, tha Ruçi.
