Zëdhënësja e Komisionerit për Zgjerim, Maja Koçijançiç ka konfirmuar se shtatori shënon rikthimin e diskutimeve, për të marrë më pas dakordësinë e vendeve anëtare për Tiranën dhe Shkupin.
“Diskutimet për kuadrin rregullator të negociatave si për Shqipërinë edhe për Maqedoninë e Veriut në Këshillin Europian kanë nisur para verës dhe do të vazhdojnë në vjeshtë, me qëllim miratimin e tyre nga vendet anëtare”, u shpreh Koçijançiç.
Shqipëria shpreson në ndihmën e Berlinit që ka Presidencën e radhës së unionit deri në fund të vitit. Me qëllim nisjen e bisedimeve për anëtarësim, Shqipërisë i janë vënë një sërë kushtesh si përparimi i reformës në drejtësi, kthimi në funksion i Gjykatës Kushtetuese dhe Gjykatës së Lartë, rezultate të prekshme në luftën ndaj korrupsioni dhe krimit të organizuar, si dhe një reformë zgjedhore konsensuale.
