Ministrja e Shëndetësisë, Ogerta Manastirliu, ka treguar se pse nuk testohen për koronavirusin të gjithë ata që shfaqen në spital si të dyshuar.
Në një intervistë për emisionin “Mbrëmje në Abc”, Manastirliu tha se nëse do të veprohej kështu, atëherë do të kishte një ulje të vigjilencës së stafeve mjekësore.
“Ka disa teori, po i shqyrtojmë të gjitha mundësitë, kur bëjnë sens dhe kur nuk riskojnë pjesën tjetër të shërbimit. Sepse mund të jetë lehtësuese bërja e tamponit për të gjithëve që vijnë në spital, por kjo mund të ulte vigjilencën e stafeve mjekësore. Po çfarë bëjmë ne: në rastet kur ka një pacient të caktuar të rastit të dyshuar, vendoset direkt për tampon dhe izolim.
Padyshim që duhet të jemi të fokusar për të zbatuar protokollet, por s’duhet të harrojmë që çdo sëmundje infektive është rrezik. Studimet kanë treguar se në spitale kur zbatohen protokollet e mbrojtjes për mjekët, risku për marrjen e infeksionit është shumë i ulët”, tha ajo.
