Gjatë inspektimit në terren bashkë me drejtorin e përgjithshëm të policisë, Ardi Veliu, Ministrja e Shëndetësisë, Ogerta Manastirliu, ka paralajmëruar se situata është serioze. E për rrjedhojë, nuk do të tolerohet asnjë neglizhencë e bizneseve. Mjaft e indinjuar me të gjithë bizneset të cilat nuk zbatojnë rregullat ndaj pandemisë, Manastirliu tha se nga sot e tutje askush nuk do të tolerohet pa zbatuar protokollin anti-COVID.
“Jemi në një situatë serioze, ku moszbatimi i masave dhe rregullave nga bizneset, cënojnë shëndetin e popullatës, pasi ndikon në përshkallëzimin e infeksionit. Ne nuk mundemi dot më të tolerojmë neglizhencën.
Ne nuk mundemi dot më të tolerojmë marrëzinë për të mos ju përgjigjur protokolleve dhe rregullave. Nuk mundemi dot të bëjmë një sy qorr dhe një vesh shurdh, kur shohim që masat nuk zbatohen në një biznes, dhe ata të cilët shërbejnë nuk mbajnë maskë. Kur shohim që në restorante ka një grumbullim përtej masës së lejuar, dhe kur në supermarket shërbejnë pa vendosur maskat”, tha Manastirliu.
Ndër të tjera, ajo paralajmëroi ashpërsimin e masave për shkelësit e ligjit. Manastirliu tha se nuk duhet të ketë asnjë tolerancë, për të gjithë ata të cilët nuk zbatojnë protokollet. Ministrja sqaroi më tej se është abuzuar shumë edhe me këshillimet, ndaj do të vijohet me gjobat dhe mbyllje e aktivitetit për shkeljet e përsëritura.
“Do të shtojmë grupet e inspektimit dhe kontrollet në qytetet që konsiderohen vatra për arsye të numrit të të prekurve, por gjithashtu për gjatë gjithë bregdetit do të vijojmë me kapacitete të shtuara sa I përket inspektimet, verifikimit të protokolleve dhe masave dhe nuk do të ketë asnjë tolerancë dhe nuk duhet të ketë asnjë tolerancë për të gjithë ata të cilët nuk zbatojnë protokollet. Nuk ka më këshillime por do të vijohet me gjobat dhe mbyllje e aktivitetit për shkeljet e përsëritura. Askush nuk e do këtë por kjo është për të mirën e shëndetit të gjithësecilit“, tha Manastirliu.
Ministrja e Shëndetësisë tha se jemi ende në kohë, për të frenuar përhapjen e virusit. “Virusi vetvetiu të mbyll, duhet të marrim masa sa jemi në kohë dhe jemi në kohë për të përmirësuar sjelljen individuale. Jemi në kohë për të ndërgjegjësuar bizneset dhe të gjithë qyetetarët se kjo luftë varet nga gjithësecili prej nesh. Ne jemi në terren, Task-Forca anti-COVID është në terren, shteti është ketu për t’ju pergjigjur gjithë nevojave të qytetarëve, por nga ana tjetër kjo luftë kërkon angazhim personal”, tha Manastirliu.
Drejtori i Përgjithshëm i Policisë, Ardi Veliu, u shpreh se Policia e Shtetit është e angazhuar jo vetëm për monitorimin e personave që janë të konfirmuar pozitivë dhe duhet të qëndrojnë të izoluar. Por edhe në ndihmë të Task-Forcës ne terren, për ndjekjen dhe zbatimin e protokolleve për frenimin e përhapjes së infeksionit COVID-19.
