Në mbledhjen e qeverisë, kryeministri Rama tha që në krye të herës se po bëjnë detyrën, për tu mbrojtur nga koronavirusi vdekjeprurës.
Ai kërkoi bashkëpunim nga ana e qytetarëve, për të fituar në këtë luftë që është botërore. Duke sjellë në fokus mbylljen e shkollave, kopshteve e çerdheve, ai nënvizoi se është një kohë lufte për ne, ndaj duhet një kujdes i shtuar.
Ndaj të gjithë bashkërisht, duhet të bëjnë maksimalen për të kufizuar koronavirusin. “OBSH kërkon kufizim të kontakteve në maksimum”, tha ndër të tjera kryeministri Rama, duke shtuar se na duhet të luftojmë me një armik të padukshëm.
Ndër të tjera, ai bëri thirrje për shmangie të lajmeve të rreme, duke shtuar kësisoj frikën dhe pasigurinë tek qytetarët.
“Thirrja për të kufizuar në maksimumin e mundshëm kontaktet fizike është një thirrje që buron nga OBSH, dhe se shërben për ruajtjen e njëri-tjetrit. Vendosëm që të mbyllim shkollat, kopshtet, çerdhet, universitetet, jo për t’i dhënë fëmijëve tanë një javë pushim për tu mbledhur në pub-e apo argëtuar si të ishte një kohë e zakonshme. Kjo është një kohë lufte që ne do e luftojmë, por aman të gjithë së bashku duhet të bëjmë çmos që të kufizojmë dëmet që mund ti shkaktohen jo vetëm trupit fizik të vendit për shëndetit tonë, shëndetit të njerëzve tanë.
Nga ana tjetër, kjo nuk është një luftë ku vihet në pah tërësia e virtyteve njerëzore që lidhet me guximin dhe trimërinë e personave, apo pasioni për lirinë deri ne vetësakrifikim. Kjo është një luftë me një armik fare të padukshëm që hyn në trupin tonë, dhe njerëzve tanë më të dashur. Duke na kërcënuar seriozisht shëndetin dhe jetën e më të moshuarve apo të sëmurëve mes nesh. Kjo do të thotë se mund të jesh malësor, mund të jesh lab dhe mund të kesh shumë për tu krenuar me historinë e trimërisë, por në këtë rast ky armik nuk ka pyetur as nga vjen dhe as kush je, por godet”, tha Rama.
