Prej ditësh, presidenti Ilir Meta ka dhënë mesazhe të forta, e mbi të gjitha i ka kërkuar qytetarëve që të bëhen bashkë në datën 2 mars për atë që e cilëson si ‘grusht shteti’. Kreu i Shtetit, dje për herë të parë ka qenë më konkret për manifetimin e tij që do zhvillojë në 2 mars. Ai i ka mëshuar fort faktit se do të bëjë gjithçka që qytetarët do t’i kërkojnë në tubimin e 2 marsit në bulevardin “Dëshmorët e Kombit” para Kryeministrisë, duke nënkuptuar se nëse sovrani do t’ia kërkojë këtë gjë, ai mund ta marrë në konsideratë.
Sipas tij, nëse populli në shesh i kërkon të shpërndajë Parlamentin, do e bëjë një gjë të tillë. Ai tha se Parlamenti sillet si i shpërndarë, dhe si një institucion i shpartalluar. Po ashtu ai shtoi se “të jenë të sigurt se Presidenti i Republikës do të bëjë detyrën e tij në mënyrën më shembullore për rivendosjen e rendit kushtetues, dhe do t’i kërkojë të gjithëve të bëjnë detyrën e tyre, të gjithë aktorëve të tjerë”.
Pas sulmeve ndaj kreut të KED, Ardian Dvoranit dhe ministres së Drejtësisë, Etilda Gjonaj, presidenti Ilir Meta ka shigjetuar ambasadorët të atashuar në vendin tonë, teksa i ka bërë përgjegjës për krizën politike dhe institucionale që ka kapluar Shqipërinë. Meta paralajmëroi se do të dalin fakte komprometuese që implikojnë disa prej ambasadorëve të atashuar në vendin tonë, në atë që ai e quajti puç kushtetues.
Lidhur me këtë situatë kaotike që ka kapluar vendin tonë, “Tirana Today” pyeti qytetarët në një sondazh nëse ata do të merrnin pjesë në protestën e thirrur nga presidenti Meta në datën 2 mars.
“A do të merrni pjesë në protestën e shpallur nga presidenti Ilir Meta më datën 2 mars?”, ishte pyetja e parashtruar, e cila mori përgjigje të shumta nga ana e qytetarëve.
Po si janë përgjigjur qytetarët në lidhje me atë se çfarë pritet të ndodhë në ditët në vijim?
1 mijë e 400 qytetarë janë shprehur kundër. Ata nuk marrin në konsideratë thirrjet e presidentit Meta.
Nga ana tjetër e monedhës qëndrojnë edhe qytetarët të cilët do të jenë të pranishëm në protestën e thirrur nga ana e Kreut të Shtetit. Behet fjalë për 594 persona të cilët kanë votuar se do të jenë në protestën e 2 marsit.
Se çfarë do të ndodhë në protestën e 2 marsit, kjo mbetet për tu parë!
TIRANA TODAY
