Presidenti Ilir Meta, ka publikuar prova të reja për atë qe ai e quan grusht shteti nga qeveria. Në fjalën e tij hapëse, ai tha se kryeministri Edi Rama është ideatori dhe ekzekutori i këtij grushti shteti, dhe do jetë ai që do mbajë përgjegjësi para popullit shqiptar. Kreu i Shtetit u shpreh se gjysmë-parlamenti dhunon Kushtetutën e popullit shqiptar.
“Prova të reja të përpjekjes së gjysmë parlamentit, për të hedhur hapin final për kurorëzimin e grushtit të shtetit. Ju e dini që është marrë iniciativë nga disa deputetë gjoja të pavarur, por kjo është zbatim i programit politik të Këshillit të Ministrave, e kanë marrë nga Don Doni.
Provë tjetër që është kryeministri ideatori, frymëzuesi dhe ekzekutori, e ai do jetë përgjegjesi i parë dhe i drejtpërdrejtë që do vijë pas triumfit të grushtit të shtetit dhe do vijë patjetër”, tha Meta.
Një ditë më parë, presidenti Ilir Meta tha se pas Ardian Dvoranit, të tjerë zyrtarë janë implikuar në grushtin e shtetit. Meta dorëzoi në Prokurorinë e Posaçme kallëzim shtesë ndaj kryetarit të Këshillit të Lartë të Drejtësisë, Ardian Dvorani.
