“Një kapitull i ri fillon për Kosovën”. Kështu e ka nisur fjalimin e tij menjëherë pas betimit të qeverisë së re, Albin Kurti. I cili do të jetë edhe drejtuesi i koalicionit qeverisës Vetëvendosje-Lidhja Demokratike e Kosovës.
Fitorja e Vetëvendosjes në zgjedhjet e parakohshme parlamentare të tetorit të vitit të kaluar, për shumë u cilësua si shpresë për ndryshime rrënjësore për shtetin më të ri në Evropë. Pasi shumë besonin në vizionin dhe siç disa e kanë quajtur ‘mos-përlyerjen’ e Albin Kurtit. Madje, fill pas fitores së Vetëvendosjes, edhe shumë shqiptarët në Shqipëri filluan të artikulojnë se edhe në vendin tonë duhet të vijë një “Albin”.
Por, çfarë mendojnë sot qytetarët në Shqipëri, si e shohin ata figurën e Kurtit dhe si e shohin ndikimin e karriges së pushtetit.
“Për një komunist në krye kishte mbetur Kosova. Në politikë nuk ka asgjë taksative, je ndryshe kur je në pushtet. Karrigia e pushtetit shumicën e shqiptarëve e ka ndryshuar.”
“Një 10% mund të them që nuk ka ndryshuar, por 90% i ka ndryshuar karrigia.”
“Kurti mirë duket, patriot. Jashtëzakonisht djalë i përgatitur dhe është kënaqësi e për popullin e Kosovës që e ka në krye.”
“Shumë i mirë është , i zoti dhe djalë i ri, që do të sjellë ndryshime në Kosovë.”
“Mua më duket pak i parakohshëm, sepse është pa përvojë. Si edhe me ndjenja djaloshare, por të pakontrolluara mirë. Por, në atë ambient që është ai, ishte e nevojshme të jetë ai në krye.”
“Ça është Albin Kurti, asnjë gjë. Nëse është kryeministër i Kosovës, dihet që është nomeklaturë e Amerikës. Kosova nuk është shtet njëherë, është proletariat i Amerikës. Nuk e konsideroj unë atë shtet, sepse nuk është dhe varet nga OKB-ja.”
Veç politikave që pritet të ndërmarrë për marrëdhëniet e brendshme, sytë e të gjithëve janë te bisedimet me Serbinë. Për të cilat Kurti është shprehur se është i gatshëm t’i drejtojë ato, duke krijuar një ekip gjithëpërfshirës. Ku sipas tij, do të hiqen tarifat ndaj mallrave serbe, pasi të vendosen masat e reciprocitetit me Serbinë. Një politikë që edhe qytetarët në Shqipëri e mbështesin.
“Heqja e taksës duhet të ketë një kompromis në marrëdhënie me vizat dhe gjithë probemet. Që edhe Kosova të mos jetë si një popull i vetmuar.”
“Po taksa do të hiqet dikur sepse ndryshe nuk do të rregullohen ndonjëherë marrëdhëniet.”
“Kurti do ta vendosë konceptin e reciprocitetit me Serbinë dhe do të hiqet taksa. Të njëjtën gjë që bën Serbia duke ndaluar mallrat kosovare.”
“Do të vendoset reciprociteti mes dy vendeve. Do të shihen të gjitha marrëveshjet që janë bërë më herët dhe pas kësaj do vendoset. Nëse nuk do të arrihet, qofshim shëndoshë.”
“Këto janë lojëra politike dhe më mirë se e dinë ata, nuk mund t’i dimë ne. Por, ne nuk e shohim Serbinë që të tërhiqet. Sepse serbi është serb.”
Por, krahas tyre, janë edhe ata qytetarë të cilët janë më indiferent dhe nuk kanë asnjë informacion për kryeministrin e ri të Kosovës./ TIRANA TODAY
