Policia italiane ka bërë të mundur kapjen dhe arrestimin e autorit, që dyshohet të ketë përplasur për vdekje 36-vjeçarin shqiptar.
Franko Gjinaj u përplas me makinë të dielën në mbrëmje, ndërsa autori ishte larguar menjëherë nga vendi i ngjarjes. Por pas fillimit të hetimeve policët kanë mundur të bien në gjurmët e autorit. Mediat italiane raportojnë se ai e kishte dërguar makinën në servis vetëm pak orë pas aksidentit.
Ai donte që ta riparonte sa më shpejt që të ishte e mundur, ndërsa mekanikut i kishte thënë se kishte përplasur një dre.
Sipas hetuesve, mekaniku që kishte marrë përsipër riparimin e makinës një golf të bardhë, nuk ishte në dijeni të fakteve. Kur policët mbërritën në garazhin 20 km larg vendngjarjes, ata vunë re se kishte ende shenja të dukshme të përplasjes në makinë.
Nichol Milani, 35 vjeç, punëtor u shoqërua në komisariat, ku edhe u mor në pyetje. Ai u tha hetuesve se ai kishte goditur aksidentalisht këmbësorin kur udhëtonte në atë rrugë, duke i vënë fajin mjegullës.
35-vjeçari u transportua në burg në Torino, ku do t’i duhet të përgjigjet për vrasjen në rrugë dhe mos dhënien e ndihmës. “La Stampa” shkruan se funerali i të ndjerit Gjinaj do të bëhet në Malësi të Madhe, nga ku ka ardhur familja e tij.
