Kryeministri i Kroacisë, Andrej Plenkovic ka premtuar se do të punojë për të hapur negociatat e anëtarësimit të Shqipërisë dhe Maqedonisë së Veriut me BE-në. Kroacia tashmë do të mbajë presidencën e radhës së BE-së për 6 muajt e ardhshëm.
“Do të bëjmë më të mirën e mundshme për të kapërcyer problemet dhe për të zhbllokuar procesin, gjë që nuk ndodhi në tetor 2019”, tha kryeministri kroat.
Kroacia, e cila u bë pjesë e BE-së në vitin 2013, është vendi i fundi që i është bashkuar bllokut. Qeveria kroate e ka listuar zgjerimin e BE-së si një ndër prioritetet kyçe gjatë kryesimit të saj të presidencës së Bashkimit Evropian.
Kujtojmë se Shqipërisë dhe Maqedonisë së Veriut iu mohua hapja e negociatave për në BE në tetor të vitit që kaloi.
