Fatos Xheta, shqiptari që akuzohet se ka vrarë me thikë bashkëshorten e tij ka dëshmuar sot para trupit gjykues në Angli.
Teksa merrej në pyetje, Xheta insistonte se nuk mbante mend ta ketë vrarë gruan, ndërsa besonte se ajo është gjallë.
Sipas mediave britanike, Prokurorët vendas pretendojnë se Xheta e ka vrarë gruan e tij Safien 35 vjeçe me thikë kuzhine, teksa ajo qëndronte në shtrat.
Në dëshminë e dhënë në gjuhën shqipe, përkthyer nga një përkthyes anglez, 46-vjeçari pretendoi se nuk mban mend as kur ka ardhur në Mbretërinë e Bashkuar, kurse mohoi të ketë bërë ndonjë veprim të gabuar në jetën e tij. Po ashtu, ai nuk mbante mend as që ka punuar në një fabrikë BMV-je.
Kur u pyet se çfarë i kujton shtëpia e tij në rrugën Lytton, ai tha se nuk e mbante mend. Kur u pyet se a e ka vrarë gruan, u shpreh se “nuk e dinte” dhe se “beson se nuk ka kryer vrasje”.
Ai deklaroi se nuk mbante mend dhe me siguri që nuk ka shkruar një letër, ku thuhej se “tradhtia lahet me vdekje”. Pastaj, Fatos Xheta u pyet nëse e dinte se gruaja e tij ka pësuar lëndime fatale për jetën, e tha se “jo nuk e di”.
Fatos Xheta është shprehur në dëshmi se mbante mend vetëm se drejtonte kamion, punë që ai e ka kryer para se të shkonte në Mbretërinë e Bashkuar.
Hetuesit dyshojnë se Xheta sillet vetë si një i çmendur.
