Veç humbjeve të mëdha, shkatërrimit dhe frikës, tërmeti i 26 nëntorit la pas një solidaritet të madh të shqiptarëve. Nuk kishte rëndësi nëse ishe i madh apo i vogël, nëse ishte person i thjesht apo personazh publikë. Të gjithë u munduan të ndihmonin të prekurit nga ato lëkundje fatale.
Siç vazhdojnë të bëjnë ende një grup i madh të rinjve, të cilët mbushin kamionët dhe shkojnë pranë gjithë atyre familjeve që veç të gjithave kanë humbur dhe shpresën. Janë vullnetarët e fondacionit “Fundjavë Ndryshe”, këto vajza e djem që janë shembulli më i mirë i rinisë sonë.
Jetojnë me ideale, me bindjen se Shqipërinë mund ta bëjnë vetëm të rinjtë. Njëjtë si studentët e viteve ’90, të cilët edhe pse për një qëllim tjetër, sërish treguan se ndryshimi mund të vijë veç nga forca e rinisë. Ndaj, edhe për këtë arsye, Lëvizja Studentore Shqiptare ’90-’91 i dha “Fundjavës Ndryshe” titullin “ Pishtari I Humanizmit”.
https://www.youtube.com/watch?v=A9IE5R6pHhc&feature=youtu.be
Në takimin e zhvilluar në ambientet e Qendrës së Solidaritetit, fjalën hyrëse e kreu anëtari i kryesisë së ISSH, Gjin Progni. I cili bëri edhe dorëzimin e dekoratës së veçantë.
“Lëvizja Studentore Shqiptare ’90-’91 i jep fondacionit “Fundjavë Ndryshe” vlerësimin ‘Pishtar i Humanizmit’. Si përçuese e vlerave më të larta vullnetare dhe njerëzore.”
Ndërsa, kryetari i Lëvizjes Studentore Shqiptare Ilir Dizdari shprehu vlerësimin e madh për gjithë të rinjtë që janë pjesë e “Fundjavë Ndryshe” dhe për drejtuesin e saj Arbër Hajdarin.
“Kjo dashuri, ky solidaritet i pamë pikërisht këto ditë nga tërmeti që ra në Shqipëri. Dhe këto djem e vajza e kanë treguar se çfarë mund të bëjnë në këto katër vite. Sot “Fundjava Ndryshe” po bën të njëjtën gjë me idealizmin e saj. Duke e ndryshuar mentalitetin e shqiptarëve. Si edhe duke bërë të mundur që të rinjtë shqiptarë të mos largohen nga Shqipëria.
Të kontribuojnë këtu, të punojnë dhe të ndërtojnë atë ëndërr të vjetër të gjithë shqiptarëve. Modeli që ka krijuar “Fundjavë Ndryshe” dhe Arbër Hajdari është një model i cili ne shqiptarët duhet ta ndjekim. Sepse është ai model që fatkeqësisht pas viteve ’90-të i ka munguar shoqërisë shqiptare.”
Drejtuesi i fondacionit, Hajdari foli për rëndësinë e madhe dhe ndikimin e jashtëzakonshëm që pati solidarizimi kaq i madh i njerëzve për të prekurit e tërmetit.
“Ju jeni pjesë e frymëzimit për punën që ne bëjmë, në fushën e solidaritetit, humanizmit, vullnetarizmit e bamirësisë. Me mijëra të rinj e të reja shqiptarë, të organizuar vullnetarisht brenda dhe jashtë vendit. Që në momentet e para të tërmetit tragjik të 26 nëntorit po udhëheqin kauzën e solidaritetit. Për banorët e prekur rëndë nga kjo fatkeqësi natyrore.
Tërmeti që goditi një pjesë të territorit të Shqipërisë shkaktoi viktima dhe dëme të shumta. Vullnetarët e “Fundjavë Ndryshe” që në momentet e para u bashkuan dhe iu gjendën pranë mijëra qytetarëve. Dua të falënderoj me mirënjohje të thellë çdo vajzë e djalë që është vullnetarë në shërbim të komunitetit.”
Ndërsa vullnetarët bëjnë thirrje bashkëmoshatarëve të tyre të bashkëngjiten në vepra të tilla. Sepse vetëm në këtë mënyrë mund të bëhet një ndryshim i madh.
“Kemi bërë një punë të jashtëzakonshme, kemi qenë 24 orë pranë familjeve të prekura. Duke çuar baza ushqimore, ndihma të ndryshme.”
“Duke qenë që në këto ditë zie që ne po përjetojmë si të gjithë shqiptarët, mendoj se të qenurit pranë dhe të bashkuar na bën krenar. Sepse së bashku mund të arrijmë dhe të bëjmë gjëra shumë më të mëdha.”
Deri më tani fondacioni ka arritur të mbledhë 2 milion dollarë nëpërmjet llogarisë online dhe të shpërndajë ndihma, si ujë, ushqime të gatuara, rroba, dyshekë, veshmbathje dhe shtretër të cilët janë dërguar në zonat e prekura. Ndihmat në vlerën 1.8 milion dollarë kanë ardhur nga Kosova, Maqedonia dhe shume njerëz të cilët i janë bashkuar thirrjes që ka bërë “Fundjavë Ndryshe”. Hajdari thekson tashmë është e rëndësishme të mobilizohen e të koordinohen me qeverinë sa më shpejt. Sepse fondacioni “Fundjavë Ndryshe” është gati të niset me procesin e rindërtimit dhe restaurimit.
“Ne kemi arritur që situatën ta menaxhojmë mirë, kemi qenë në terren të fokusuar. Pranë njerëzve, qoftë me shpërndarjen e ndihmave materiale. Por, edhe online me grumbullimin e fondeve. Të cilat do të jenë pjesë e fondit të rindërtimit që “Fundjavë Ndryshe” ka marr përsipër. Për të nisur sa më shpejt me rindërtimin, blerjen e banesave apo rikonstruksionin e shtëpive të gjithë atyre që kanë mbetur të pastrehë. Ne bëjmë aq sa njerëzit kanë dhuruar.
Pra, aktiviteti jonë shtrihet në dorën e njerëzve. Në dorën e atyre 60 mijë njerëzve që deri sot kanë dhuruar. Por, sigurisht në aspektin financiar të dëmit që është bërë, shuma që ka grumbulluar “Fundjavë Ndryshe” është asgjë. Por, nëse ky fond do të shkojë ashtu siç duhet e aty ku ka realisht nevojë, do të ndjehet dhe me rehabilitimin e 500 banesave.”/ TIRANA TODAY
