Nga Anxhela Ferra
Ndryshe nga 2 vite më parë, zgjedhja si Prokuror i Përgjithshëm i Olsian Çelës ka ndodhur në një kohë të vështirë për vendin. Por në një situatë të qetë brenda Parlamentit. Me anë të një votimi të fshehtë, Kuvendi votoi me 101 vota pro kandidaturën e Çelës si Kryeprokuror për shtatë vitet e ardhshme. Në garë me Çelën, ishin edhe Arta Marku dhe Fatjona Memçaj.
Ish-prokurori Shkëlqim Hajdari në një intervistë për Tirana Today thotë se Olsian Çela ishte zgjedhja më e mirë për të drejtuar për 7 vite Prokurorinë e Përgjithshme.
“Ishte votim i qetë sepse u shkua në një procedurë normale. Kurse zgjedhja e zonjës Marku, ishte një situatë ekstra ligjore. Zonja Marku nuk tregoi që është lidership me sjelljen e vetë. Çela ishte më i miri, në raport me këto që kandiduan. Kjo nuk do të thotë që në prokurori nuk kishte persona të tjerë që mund ta drejtonin për pozicionin e Prokurorit të Përgjithshëm. Por, nga këto që kandiduan dhe kaluan vettingun, padiskutim që Çela ishte më i miri. Sepse ai ka një karrierë që vjen në ngritje. U duk qartë që ai kishte prioritet që në paraqitjen e platformave. Pasi kishte platformën më të mirë në raport me dy kandidatet e tjera.
Kam përshtypjen që ndërkombëtarët jo hapur, por siç punohet në gjithë rastet, nuk kanë pasur asnjë vërejtje. Dhe kanë ndikuar besoj që zoti Çela të shkojë në këtë numër që mori në Parlament.”
“Prokurorët e Përgjithshëm kanë qenë të zgjedhur politikisht”
Edhe pse me ndryshimet kushtetuese, Prokuroria e Përgjithshme tashmë është me rol të kufizuar, Hajdari thekson se ky është modeli më i mirë i drejtësisë.
“Prokurori i Përgjithshëm në Shqipëri, tashmë me ndryshimet ligjore është një figurë, e cila është kuptuar gabim. Sikur nuk ka rëndësi. Pikërisht heqja e kompetencave të Prokurorit të Përgjithshëm, për ta pasur organin e Prokurorisë të centralizuar në një farë mënyre pronë profesionale të vetën; është një nga sukseset më të mëdha. Sepse nëse më parë Prokurori i Përgjithshëm mund të ndikonte nëpërmjet vendimmarrjeve procedurale. Për orientime hetimesh, apo përfundime në një formë të caktuar. Tanimë e ka çdo prokuror në çdo njësi të prokurorisë që punon.
Prokurorët e Përgjithshëm janë zgjedhur politikisht. Këshilli i Prokurorisë ishte organ konsultativ dhe jo vendimmarrës. Dhe çdo individ që zgjidhet politikisht, nuk mund të tregojë që punon si Prokuror i Përgjithshëm tërësisht i pavarur. Pjesa e reformës për prokurorinë, sigurisht që ne presim rezultate. Por, nga pikëpamja e organizimit është një model i shkëlqyer.”
“Janari e gjen Prokurorinë e Posaçme Anti-Korrupsion me dosjet gati”
E cilësuar si struktura që do të trembë politikën, sytë e të gjithëve tashmë janë drejt ngritjes së Prokurorisë së Posaçme Anti-Korrupsion. E njohur ndryshe edhe si SPAK-u. Këshilli i Lartë i Prokurorisë ka emëruar 8 prokurorët, të cilët priten të betohen para Presidentit Meta në 19 dhjetor. Ndërsa ende duhet të zgjidhet drejtuesi i SPAK, Hajdari shprehet se Prokuroria e Krimeve të Rënda tashmë ka inventarizuar gjithë dosjet që do të hetohen.
“SPAK-u është vonuar pa diskutim, por më në fund është futur në binarët e finalizimit. Dhjetori para Krishtlindjeve do ta gjejë Prokurorinë e Posaçme Anti-Korrupsion me drejtuesin e ri. Po ashtu ndoshta do ta gjejë edhe me dy anëtarët e tjerë, të cilët do t’i propozojë drejtuesi i saj. Tashmë me sa jam në dijeni unë, po bëhen gati nga Prokuroria e Krimeve të Rënda të gjitha dosjet për të cilat bëhet kompetente Prokuroria e Posaçme Anti-Korrupsion. Dosje që i kanë në hetim dhe dosje që i kanë të pushuara.
Pra, të gjitha ato vepra penale që kanë të bëjnë për publikun me korrupsionin, me shpërdorimin e detyrës të zyrtarëve të lartë etj. Është një mori veprash penale që bëhet kompetente Prokuroria e Posaçme Anti-Korrupsion. Domethënë, janari e gjen Prokurorinë e Posaçme Anti-Korrupsion me lëndë të parë.”
“SPAK-u do të ndryshojë faqen e goditjes së krimit në Shqipëri”
Ish-prokurori paralajmëron goditje të niveleve të larta, të cilat sipas tij do të jenë si në radhët e grupeve kriminale. Por, nuk do të kursehen as eksponentë politikë, të cilët janë të lidhur me krimin.
“Tashmë me Prokurorinë e Posaçme Anti-Korrupsion, politika i ka larë duart. Sepse ajo do të punojë në kushte të tjera në Shqipëri. Do të jetë një prokurori e cila nga pikëpamja e benefiteve do të jetë e mirë paguar. Nga ana e ruajtjes fizike, do të jetë super e ruajtur, prokurorët dhe familjarët e tyre.
Nga pikëpamja e bashkëpunimit ndërkombëtar, do të ketë lidhje me agjencitë më të mira. Siç është FBI-ja e Shteteve të Bashkuara të Amerikës, të cilët do të japin përkrahjen dhe asistencën e tyre. Askush nuk mund t’i shkarkojë. Ky është organizimi më perfekt që mund të bënte një vend për t’i dhënë mundësi një trupe njerëzish që të bëhen njerëz që të ndryshojnë faqen e ndëshkimit në Shqipëri.
Të mos shohin më se cili është emri i personit që do të vihet në akuzë, por të shohin provat. Dhe pa diskutuar që është ministër, ish-ministër apo deri në nivele kryeministrore. Dhe të jeni të bindur që Prokuroria e Posaçme, me mbështetjen e ndërkombëtarëve do të ndryshojë faqen e goditjes së krimit në Shqipëri.
Pranvera do ta gjejë Shqipërinë me goditje të niveleve të cilat publiku nuk i ka imagjinuar ndonjëherë në kokën e tij. Në nivel grupesh kriminale nuk diskutohet. Por, jini të sigurt që grupet kriminale do të na çojnë dhe në lidhje politike. Në segmente të caktuara të lidershipit politik në Shqipëri.”/ TIRANA TODAY
