Kreu i Vetëvendosjes në Kosovë, Albin Kurti, ka publikuar në profilin e tij letrat që ka marrë nga liderët e rajonit pas fitores në zgjedhjet e 6 tetorit.
Mirëpo ajo çka vihet re, është se nga të gjithë urimet e marra, nuk shihet të ketë një të tillë nga kryeministri Edi Rama.
Kurtin e ka uruar kryeministri i Maqedonisë së Veriut, Zoran Zaev, ish-presidenti i Kroacisë, Stipe Mesiç, gjithashtu edhe një urim i ka ardhur nga kryeministri i Bosnje e Hercegovinës dhe nga kreu i Kuvendit të Shqipërisë, Gramoz Ruçi.
Si duket marrëdhëniet Ramës dhe Kurtit vazhdojnë të mbeten të ftohura. Një gjë të tillë e ka pohuar edhe Albin Kurti, i cili u shpreh se raportet më Ramën kanë ndryshuar për të keq, derisa ky i fundit i ka qëndruar në krah presidentit të Kosovës, Hashim Thaçit, në idenë për shkëmbimin e territoreve dhe korrigjimin e kufijve.
Por pavarësisht këtyre kreu i Vetëvendosjes ka deklaruar se raporti i tij me Edi Ramën, nuk do të afektojë në raportet shtetërore midis Republikës së Shqipërisë dhe Republikës së Kosovës.
